MAKATULONG ti panangalep-ep kadagiti mula iti pannakapagtalinaed a nadam-eg ti daga para iti mula, ken palamiisanna dagiti ramut dagiti mula. Mabalin pay a lapdanna ti panagreggaay dagiti kinelleng, ken papintasenna ti buya dagiti mulatayo.
No agtalinaed ti kinadam-eg ti daga, kayatna a sawen, saan a kasapulan nga inaldaw a sibugantayo dagiti mula. Maliklikan ti panagproblematayo iti kinakurang ti danum.
Adu dagiti mabalintayo a pagalep-ep. Adda dita ti nagragadian, garami, ken dagiti pakapak (natnatnag a bulong dagiti kayo).
No adda met igatangtayo, mabalintayo met ti agusar iti plastic mulch (kas iti nailadawan).
DAGITI VLOGGER ITI AMIANAN 15: Intayon Makiwatwat Idiay Bagulin!
No napintas ti pannakaipuesto ti alep-ep, kas iti garami, in-inut nga agrupsa daytoy agingga nga agbalin a nayon a taraon dagiti mula. Kangrunaanna, tumulong a mangpapintas iti kalidad ti daga nga agresulta iti napimpintas nga apit.
Saan laeng a dagiti nateng ti mabalin nga alep-epan, mabalin pay a palawlawan dagiti kayo tapno mapagtalinaed ti dam-eg ti daga a nakaimulaanda. Nupay kasta, siguraduen a nasayaat ti pannakaipuesto ti alep-ep tapno di pagbalayan ti bao. --O
(Bannawag, Hunio 16-30, 2023)
