Adda karbengan ni Presidente Ferdinand Marcos Jr. (PBBM) nga agkiddaw iti bicameral conference committee nga agtataripnongda manen tapno maurnos dagiti mapagsusupiatan a banag iti pinal a bersion ti PhP6.532 a trilion a nailian a badiet para iti 2025.
Daytoy ti imbatad ni Senador Juan Miguel “Migz” Zubiri ita nga aldaw, Disiembre 16, ta patienna a kabaelan ni PBBM a risuten dagiti mapagduaduaan a pannakanayon ken pannakakissay ti pondo dagiti dadduma nga ahensia para iti sumaruno a tawen, nga inaprobaran ti Senado ken Kamara itay napan a lawas.
Segun ken ni Zubiri, saan pay a napirmaan ti Presidente ti singasing a badiet, ket sakbay a dumanon iti Malakanyang, mabalin a kiddawen ti Presidente iti Senate President ken House Speaker a kayatna a baliwan dagiti dadduma a banag iti bicam report para iti badiet iti 2025.
Kinuna ni Zubiri a naklaat idi makitana ti dakkel a naikissay iti badiet ti Department of Education (DepEd) para iti 2025 idinto a segun iti Konstitusion, ti edukasion ti masapul a maipangpangruna unay iti tinawen a badiet ti pagilian.
Mayawiden ti bangkay ti napapatay a Filipina iti Slovenia, segun iti DFA
Pinalagipan ni Zubiri dagiti kakaduana a rumbeng nga agtalinaed nga agwaywayas ti Senado ta daytoy ti maudi a sarikedked, saan laeng nga ti demokrasia, no di ket pay ti maudi a sarikedked ti pannakabalbaliw dagiti institusion.
Innayon ni Zubiri a kitkitaenda ti pagsayaatan ken panagdur-as ti sibubukel a pagilian, saan laeng nga iti maysa a distrito wenno probinsia. (Hannah L. Torregoza/Manila Bulletin//Lito Hilidon/Bannawag)
