Kinastigar ni Antipolo City 2nd district Rep. Romeo Acop da Senador Ronald Dela Rosa ken dati a chief presidential legal counsel Salvador Panelo gapu iti panangibagbaga dagitoy a naisayangkat ti imbestigasion ti House quad-committee (quad-comm) tapno mapadakes wenno madadael ni dati a presidente Rodrigo Duterte ken dagiti kakadua daytoy.
Iti statement ni Acop idi Dis. 15, kinunana a ti agtultuloy a panagpalutpot ti quad-comm ket naibatay iti ebidensia a saan ket a gapu iti personal wenno politikal a motibo.
“Ar-aramidenmi laeng ti trabahomi. Saan a maipapan daytoy iti panangdadael iti asino man wenno ania man a grupo. Maipapan daytoy iti pannakatakuat ti kinapudno,” kinuna ni Acop, senior vice chairman ti quad-comm.
“No iti panagkuna ni Senador Dela Rosa ket biddut dagiti findings-mi, rumbeng a mangidatag iti ebidensia a mangkontra kadagitoy imbes nga agtalanggutang iti awan pakaibatayanna nga akusasion a panagpolitika ti ranta dagitoy (nga imbestigasion)," kinuna pay ni Acop.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Kabayatan ti quad-comm hearing idi Huebes, Dis. 12, nangidatag ti Acop iti summary ti findings ti quad-comm iti agsasaruno a 13 a hearings, a narugian idi Agosto 2024.
Segun ken ni Acop, ti nadara a kampania ni Duterte a war on drugs ket nagserbi a panglinged iti “grand criminal enterprise” ti ilegal a drug trade nga inwayat ken nagnumaran ti dati a presidente ken dagiti nasinged a kakaduana, imbes a pukawenda daytoy kas inkarida iti publiko.
Dinakamat ni Acop a dagiti testimonia manipud kadagiti kangrunaan a personalidad, kas ken ni dati a Police Colonel Eduardo Acierto, ket nalawag a nanginagan kada Duterte ken Senador Christopher “Bong” Go ken Dela Rosa kas “kangrunaan a tattao a mangprotprotektar iti illegal drugs network iti Filipinas.”
Iti maysa nga interbiu, kinontra ni Dela Rosa a maysa isuna kadagiti kangrunaan a tao iti drug network. Ta ngamin, ti senador ti kangrunaan a nangipatungpal iti gubat kontra droga kas hepe idi ti Philippine National Police (PNP).
“Dagitoy a findings ket saan nga ispekulasion wenno personal nga opinion. No adda maisupadi nga ebidensia ni Senador Dela Rosa, idatagna koma. Ta no saan, awan kaes-eskan dagiti akusasionna,” kinuna ni Acop.
Impaganetget ni Acop a ti imbestigasion ti Kongreso ket “saan a maipapan kadagiti personalidad,” no di ket maipapan iti panangtakuat iti kinapudno ken panangsapul iti hustisia para kadagiti biktima ti naames a kampania kontra droga.
Inakusaran met ni Panelo, a nagserbi pay a presidential spokesperson ni Duterte, a bin-ig a panagpolitika ti ob-obraen ti quad-comm.
Kinuna ni Panelo a malaksid iti “panangdadael” iti dati a presidente, nadesinio pay dagiti hearing tapno “madadael” ti gundaway ni Bise Presidente Sara Duterte iti 2028 presidential race.
Iti biang ni Acop, kinunana a "saan a maipapan iti political maneuvering wenno panangpuntiria iti asino man para iti 2028" a kas imbaga ni Panelo.
"Pasurotnaka laeng ti dati a Presidente. Apay a saan a mismo a ti dati a Presidente ti agilawlawag?" kinuna ni Acop. Nupay kasta, kinunana met a masansan a dagiti mismo a ibatbatad ni Duterte ti mangirubrubo iti bagbagina, kas iti inaramidna iti panagparangna iti quad-comm hearing idi Nobiembre 13.
“Ni dati a Presidente Duterte a mismo ti nagibaga kadagiti bambanag a naitunos kadagiti ebidensia a naduktalanmi, partikular kadagiti extrajudicial killing,” inlawlawag ni Acop.
Kinuna pay ni Panelo a dagiti testimonia ken findings ti quad-comm “ket naipapilit a testimonia wenno naibatay iti hearsay.”
Kinuna met ni Acop a dagiti saksi a kas ken ni Acierto ken dadduma pay ket disnudo nga immasideg a mismo iti quad-comm tapno ibinglayda ti ammoda maipapan iti pannakaisayangkat ti gubat kontra droga. (Dexter Barro II/MB)
