Dagiti nagdadarison a kinakurang ti impraestruktura, parikut iti krimen, agraman ikakaro ti risiris iti China ti manglapped iti panagsubli iti pigsa ti turismo iti Filipinas, segun iti Economist Intelligence Unit (EIU) itay Disiembre 10.
Segun ken ni Alex Holmes, regional director ti EIU para iti Asia, ti agdama a kasasaad ti turismo iti Filipinas ket kasungani iti panagrang-ay ti turismo dagiti kabangibangna a pagilian iti Southeast Asia a kas iti Indonesia ken Thailand.
Nupay adu ti napipintas a pagpasiaran iti Filipinas ken nalaing iti Ingles dagiti Filipino, kinuna ni Holmes a ti nakurang nga impraestruktura ken panagraira ti krimen dagiti makatubeng iti panagrang-ay ti turismo ti Filipinas.
Maysa pay a tumaud a parikut ti kumarkaro a panagriri ti China ken Filipinas maipoon iti West Philippine Sea (WPS), ta saan leang a pangta daytoy iti reputasion ti Filipinas, no di ket apektaran pay daytoy ti iseserrek dagiti Intsik iti pagilian.
Mayawiden ti bangkay ti napapatay a Filipina iti Slovenia, segun iti DFA
Inlawlawag ni Holmes a gapu iti panagriri ti Filipinas iti ar-aramiden ti China iti WPS, mabalin a paritan ti gobierno ti China dagiti umilina a saandan nga agpasiar iti Filipinas, ket agpasiarda laengen iti sabali a pagilian. (Ben Arnold De Vera/Manila Bulletin//Lito Hilidon/Bannawag)
