Maysa a 15-anios nga estudiante ti nagpaltog iti uneg ti study hall ti Abundant Life Christian School idiay Wisconsin, U.S., a nakatayan a dagus ti maysa a mannursuro ken maysa nga estudiante ken nakasugatan ti innem pay a pakairamanan ti dua nga estudiante a kritikal ti kasasaadda, ita a Martes (Lunes idiay U.S.), Dis. 17.
Binigbig dagiti immarayat a polis ti nagpaltog a ni Natalie Rupnow, a nasarakan nga addaan sugat babaen ti paltog ken mapapati a nag-suicide daytoy. Naitaray iti ospital ngem natay sakbay a maidanonda.
Kinuna ni Madison Police Chief Shon Barnes a maysa a titser ken tallo nga estudiante a di unay nakaro ti pannakadangranda ti naipan iti ospital ket dua kadakuada ti napalubosanen a rummuar idi agangay.
Segun iti polis, naammuanda ti pammaltog gapu iti awag iti 911 ti maysa a second-grade student.
Kari ni Trump a panangikkat iti birthright citizenship: Maaramidna kadi a talaga?
Maysa a non-denominational Christian school ti Abundant Life iti Madison, Wisconsin nga addaan iti pre-kindergarten agingga iti hayskul ken addaan aganay a 420 nga estudiante.
Patien dagiti imbestigador a nagusar ni Rupnow iti 9mm pistol. Saan met dagus a naammuan no ania ti motibo ti panagpaltog ni Rupnow ken saan met a nalawag no inrantana a pinuntiria dagiti biktima.
Binangenanen dagiti polis dagiti kalsada iti aglawlaw ti eskuela, ket addan dagiti federal agent iti lugar tapno tumulong kadagiti lokal a pannakabagi ti linteg.
Nagsasarak met dagiti ubbing ken pamiliada iti maysa a health clinic nga agarup maysa a milia (1.6 a kilometro) manipud iti eskuela.
Daytoy a pammaltog iti uneg ti eskuela ti kaudian iti pinulpullon a a napasamak iti sibubukel a U.S. kadagiti kallabes a tawen, a kas kas kadagiti napasamak idiay Newtown, Connecticut; Parkland, Florida, ken Uvalde, Texas a nakatayan ken nakasugatan ti adu nga ubbing ken mannursuro.
Segun iti datos iti website ti anti-violence organization nga Everytown for Gun Safety, iti 2024, addan di kumurang a 202 nga insidente ti panagpaltog kadagiti ikub ti eskuela, a nagresulta iti 56 nga ipapatay ken 147 a pannakadangran. Saan pay mairaman ditoy a datos ti kaudian a pammaltog idiay Madison.
Ti kakaruan a pammaltog iti eskuela iti 2024 ket napasamak idi Septiembre iti Apalachee High School idiay Georgia, U.S. Segun kadagiti autoridad, namaltog ti 14-anios nga estudiante a ni Colt Gray babaen ti semiautomatic assault-style rifle ket 4 a tattao ti natay ken 9 pay ti nasugatan.
Idi 2023, 45 a tattao ti natay iti 158 a pammaltog iti eskuela; ket idi 2022, 67 a tattao ti natay iti 181 a pammaltog iti eskuela, segun pay iti datos ti Everytown for Gun Safety.
Dagiti met paltog met ti kangrunaan a pakaigapuan ti ipapatay dagiti ubbing idi 2020 ken 2021, segun iti KFF, maysa a non-profit a mangsuksukisok kadagiti isyu iti panangtaripato iti salun-at. (SCOTT BAUER/Associated Press)
