Gapu iti kaadu ti gannuat inton umay a tawen, kiddawen ti Department of Agriculture (DA) a mailaksid koma dagiti proyektoda iti election ban on public spending tapno saan nga agsardeng wenno maitantan ti pannakairingpas dagitoy.
Segun ken ni Sekretario ti DA Francisco P. Tiu Laurel Jr. itay Disiembre 16, agsagsaganan ti DA a mangidatag iti kiddaw a mailaksid koma amin a programa ken proyekto ti ahensia iti ipatungpal ti Commission on Elections (Comelec) nga election ban bayat ti mapasungad a Midterm Election inton Mayo 12, 2025.
Maibatay iti naipablaak a 2025 Fiscal Risks Statement ti Cabinet-level Development Budget Coordination Committee (DBCC) a mangbukel iti economic team ni Presidente Marcos, kinunana a ti Midterm Election ti mabalin a mangpabassit iti panaggasto kadagiti produkto ken serbisio, agraman pannakaitantan dagiti proyekto.
Kinuna ni Laurel nga ipangpangruna ti ahensia inton umay a tawen ti pannakaipatakder ti ad-adu pay a cold-storage ken post-harvest a pasilidad, ken ti pasayak a patarayen ti bileg ti init. Mairugi met inton sumaruno a tawen ti panggep ti DA a panangbaliw iti kalendario ti panagmula dagiti mannalon a buyogen ti tulong dagiti government financial institutions (GFIs), Development Bank of the Philippines (DBP), ken Land Bank of the Philippines (LandBank).
Mayawiden ti bangkay ti napapatay a Filipina iti Slovenia, segun iti DFA
Manamnama a maipatungpal dagitoy a proyekto nupay nakissayan iti PhP9 a bilion agingga iti PhP20 a bilion ti singasing a badiet ti DA para iti 2025. (Ben Arnold De Vera/Manila Bulletin//Lito Hilidon/Bannawag)
