Manamnama a makasublin iti Filipinas ni Mary Jane Veloso, ti Filipina a naibalud iti Indonesia, itoy a lawas kalpasan a pinirmaan ti Filipinas ken Indonesia ti katulagan ti panangiyakar (transfer agreement) iti kasona.
Impakaammo ni Eduardo Jose de Vega, Undersecretary ti Department of Foreign Affairs (DFA), itay Disiembre 16, a nayakaren ni Veloso manipud Yogyakarta agturong iti kabesera ti Indonesia, a paglugananna iti eroplano nga agawid iti Filipinas.
Kinuna ni De Vega a mabalin nga agawid ni Veloso iti las-ud ti dua wenno tallo nga aldaw.
Segun ken ni De Vega, naikeddeng a mapan iti Indonesia ti pamilia ni Veloso tapno sarungkaranda koma iti pagpupokan iti Yogyakarta itoy a Paskua, ngem nakanselar ti biaheda gapu iti naawatda a pakaammo a nayakaren ni Veloso iti pagpupokan iti Jakarta.
Mayawiden ti bangkay ti napapatay a Filipina iti Slovenia, segun iti DFA
Naibalud ni Veloso iti Indonesia sipud idi 2010 kalpasan a matakuatan dagiti autoridad ti Indonesia ti 2.6 a kilo a heroin iti bagahena. Impetteng ni Veloso nga awan ti basolna, ket kinunana a naibaon laeng nga awitenna ti bagahe.
Naituding a mapapatay ni Veloso idi Abril 2015, ngem inikkan ni Joko Widodo, a presidente idi ti Indonesia, iti last-minute reprieve kalpasan a simmuko ti recruiter ni Veloso a ni Maria Kristina Sergio kadagiti autoridad iti Filipinas.
Kinuna ni De Vega a ti gobierno ti Filipinas ti mangibaklay iti magasto ni Veloso nga agawid.
Innayon ni De Vega a ti Bureau of Immigration (BI) wenno ti National Bureau of Investigation (NBI) ti mapan mangsukon ken ni Veloso iti Indonesia, kas napagnumuan ti dua a pagilian.
Iti sabali a bangir, kinuna ti gobierno ti Indonesia nga itaklinnan iti Filipinas ti pangngeddeng iti kaso ni Veloso, agraman panangipaay kenkuana iti pammakawan (clemency) ti Presidente. (Joseph Pedrajas/Manila Bulletin//Lito Hilidon/Bannawag)
