Mabalin a maapektaran ti panagsagana ti pagilian para iti 2025 Programme for International Student Assessment (PISA) gapu iti pannakakissay ti badiet ti Department of Education (DepEd), nangruna ti computerization program daytoy, segun ken ni Sekretario ti DepEd Sonny Angara itay Disiembre 16.
Iti naangay a seremonia ti panagpirmada iti Implementing Rules and Regulations (IRR) ti Academic Recovery and Accessible Learning (ARAL) Act, impakaammo ni Angara a sumaysayaat ti panagsagana para iti PISA 2025, ngem mabalin a maapektaran daytoy ti pannakakissay ti badiet ti DepEd para iti computerization program iti 2025.
Naikkat ti PhP12 a bilion iti badiet ti DepEd, ket ti PhP10 a bilion daytoy ti agpaay iti computerization program.
Makipartisipar ti Filipinas iti PISA iti maikatlo a daras inton 2025.
Mayawiden ti bangkay ti napapatay a Filipina iti Slovenia, segun iti DFA
Segun ken ni Angara, nagbilin ti Presidente a makiuman kadagiti dadduma pay a kameng ti gabinete, nangruna iti Department of Budget and Management (DBM), no kasano a maisubli ti badiet ti DepEd para iti 2025.
Kinuna ni Angara a kayat ti Presidente a maan-anay ti pannakausar ti teknolohia iti edukasion ti Filipinas, ket kayatna a maaddaan iti kompiuter dagiti amin a para iti publiko a pagadalan inton malpas ti terminona. (Merlina Hernando-Malipot/Manila Bulletin//Lito Hilidon/Bannawag)
