Impakaammo ti Department of Health (DOH) ita, Disiembre 17, nga inanamongan dagiti Board of Directors ti Philippine Health Insurance Corporation (PhilHealth) ti PhP284 a bilion a badiet ti ahensia para iti 2025 ken nanayonan dagiti benepisio, agraman dagiti case rate, iti dandani 50 a porsiento.
Kinuna ni Sekretario ti DOH Teodoro J. Herbosa nga adayo nga ad-adu ngem iti maipalubos ti linteg a limitasion ti pondo ti PhilHealth, a gapuanan ti di unay panangusar kadagiti benepisio iti panaglabas dagiti tawen, ken ti makaigapu iti dakkel a bayadan dagiti pamilia a Filipino.
Inaprobaran ni Herbosa ken dagiti kameng ti Board of Directors (BOD) ti PhilHealth itay Disiembre 16, ti PhP284 a bilion a Corporate Operating Budget (COB) para iti Fiscal Year 2025, agraman ti maikadua a panagngato dagiti napili a case rate iti 50 a porsiento, kas iti emergency care benefit, glasses ken optometric services para kadagiti ubbing, open-heart surgery benefits, ken ti pediatric cataract extraction.
Inlawlawag ni Herbosa a ti COB ti bersion ti PhilHealth iti General Appropriations Act (GAA) ti nailian a bobierno wenno ti General Appropriations Ordinance (GAO) dagiti local government units (LGU).
Mayawiden ti bangkay ti napapatay a Filipina iti Slovenia, segun iti DFA
Idauluan ti Sekretario ti DOH ti BOD ti PhilHealth a pakairamanan dagiti ex-officio member: ti sekretario ti DBM, DSWD, ken DOLE.
Naisina ken naiduma ti BOD iti Executive Officers ti PhilHealth, nga idauluan ti Presidente ken Chief Executive Officer (PCEO) a ni Emmanuel R. Ledesma, Jr., ken ni Executive Vice President ken Chief Operating Officer (EVP/COO) Eli Diño D. Santos. (Merlina Hernando-Malipot/Manila Bulletin//Lito Hilidon/Bannawag)
