Nagyaman ni Mayor ti Manila Honey Lacuna-Pangan ken ni President Ferdinand "Bongbong" Marcos, Jr. iti pannakapili ti Baseco ken Tondo a kas benepisiario ti rinibu a kilo a mackerel manipud kadagiti nasamsam a naipuslit a kargamento a naggapu iti China.
Aw-awagan dagiti dadduma daytoy nga ikan iti salmon (nupay saan met a salmon). Adda pay mangaw-awag iti daytoy iti japayuki.
Inwaras da PBBM ken Mayor Lacuna-Pangan dagiti nasamsam nga ikan kadagiti umili. Kinadua ida da Bise Mayor ti Manila John Marvin "Yul Servo" ken Diputado Irwin Tieng (Manila 5th District).
Immawat ti tunggal pamilia iti dua a kilo a mackerel, a naggapu iti naipuslit a dakkel a kargamento a natiliw ti Manila International Container Terminal (MICT).
Mayawiden ti bangkay ti napapatay a Filipina iti Slovenia, segun iti DFA
Agbalor iti PhP178.5 a milion dagiti naipuslit nga ikan manipud iti China, ken nasamsam iti Manila idi Disiembre 14.
Simmangpet ti 21 a container van a naglaon iti naipuslit nga ikan iti Manila International Container Port (MICP) idi Oktubre ken saanen nga innala ti consignee.
Naipakaammo nga awanan iti Sanitary and Phytosanitary Import Clearance ti nasao a kargamento, isu nga imbilin ni Francis Tiu Laurel, Sekretario ti Department of Agriculture, a masukimat dagitoy iti laboratorio tapno maammuanda no mabalin pay a sida ti tao dagitoy sakbay a maibunong kadagiti inapektaran ti bagyo.
Itay kallabes, nangted da PBBM ken Mayor Lacuna-Pangan iti Christmas gift kadagiti agindeg iti Boys' Town Complex iti Marikina, kadagiti empleado ken estudiante iti Valeriano E. Fugoso Memorial School, ken kadagiti pamilia a naawanan iti balay gapu iti uram iti Isla Puting Bato iti Tondo. (Diann Ivy C. Calucin/Manila Bulletin//Lito Hilidon/Bannawag)
