Usaren koma ti Philippine Health Insurance Corp. (PhilHealth) ti sobra a pondona a pangikalawa iti health benefit packages tapno maatur ti di pannakaipaay ti saranay kadagiti dadduma nga addaan an-annayen a kakailian, kas kinuna ni Sen. Loren Legarda.
Impeksa ni Legarda daytoy a kapanunotanna iti mabalin nga aramiden ti PhilHealth iti laksid ti pannakaikkat ti PhP74-bilion a government subsidy a para iti PhilHealth iti 2025 national budget. Binilion ti sobra a pondo (surplus funds) ti PhilHealth ket mabalinna nga ipakat a naan-anay ti Universal Health Care (UHC) Law uray pay awan subsidy nga aggapu iti gobierno, innayon ti senador bayat ti Senate Committee on Health hearing idi kalman, Mierkoles, Disiembre 18.
Bayat ti hearing a nakaamirisan ti pinansial a kasasaad ken pannakaimaton ti PhilHealth kalpasan ti panangikkat ti Kongreso iti subsidy wenno kuarta a tulong ti gobierno iti nasao nga ahensia, inreport ni PhilHealth Senior Vice President Renato Limsiaco Jr. nga addaan ti ahensia iti PhP628.2-bilion ti pategna a sanikua agingga iti Oktubre 2024, a pakairamanan ti PhP281-bilion a reserbana ken PhP150-bilion a surplus funds.
Iti laksid ti pannakaikkat ti government subsidy, naikkan ti PhilHealth iti PhP284.1-bilion a Corporate Operating Budget (COB) para iti 2025, dandani 10 a porsiento ti ad-aduanna ngem iti PhP259-bilion a nayalokar para iti 2024.
2 a komander ti MILF, nasentensiaan iti 35 counts ti homicide iti Mamasapano massacre
Iti pakabuklan ti badiet, PhP271-bilion ti nailatang a para iti benefit expenses (para iti agdama ken iti maikalawa a serbisio iti salun-at). Aggapu daytoy a pondo manipud iti PhP203-bilion a direkta a kontribusion dagiti kameng, ken PhP48-bilion manipud iti surplus fund.
Kinuna pay dagiti opisial ti PhilHealth a ti matda iti surplus fund ket mabalin a manayonan iti kanito a maibus ti PhP271-bilion a para iti benefit expense iti 2025.
Indagadag ni Legarda a nasken a maikalawa ti serbisio iti salun-at ket kiniddawna kadagiti opisial ti PhilHealth nga ammuenda koma dagiti Konsulta provider centers nga addaan kadagiti ramit a para iti breast screening, ultrasound, ken mammogram ket ipakaammoda daytoy iti publiko tapno ammo dagiti tattao ti papananda pagpatulongan. “Naipaulog ti UHC Law tapno maipanamnama a maipaay ti pannaripato iti salun-at kadagiti umili,” kinuna ni Legarda. “Nakakaasi ti langa dagiti umili a mapmapan makipilpila kadagiti nadumaduma nga opisina bareng laeng maikkanda iti tulong gapu kadagiti gastosda iti ospital idinto nga adda binilion a pisos a di met maus-usar.”
Kiniddawna pay ti pannakareporma ti sumagmamano nga operasion ti PhilHealth a pakairamanan ti naparpardas a reimbursement ken pannakaipaay ti prioridad kadagiti nakurkurang ti gasatna nga umili.
“Kiskissayan ti PhilHealth ti maul-uluantayo amin idinto a matmatay dagiti tattao, agkidkiddaw iti guarantee letter, ken kakaasida nga agur-uray iti pannakalpas dagiti adu a proseso. Kabayatanna, adda kadakayo ti ginasut a bilion a kuarta a di met maus-usar. Masapul a maammuan dagiti tattao no pappapanan ti kuartada,” kinuna ni Legarda kadagiti opisial ti PhilHealth. (Hannah L. Torregoza/ Manila Bulletin)
