Di pagduaduaan a maysa ni Ji Chang-wook kadagiti kalatakan nga aktor ti South Korea isu a mapadpadaanan la unay ti sumaruno a pagparanganna a serye, ti “Gangnam B-side”, a pagakemanna kas maysa nga outlaw wenno managdakdakes nga agnagan iti Yoon Gil-ho. Idinto a naiduma daytoy nga akemna kadagiti karakter a nagparangannan kadagiti kallabes a tawen, manmanama a maipakitana a naan-anay a siglatna kas aktor iti aganayen a 16 a tawen nga acting career-na.
Gapu iti panagakemna kas kangrunaan nga agbibiag iti sumagmamano kadagiti nakallalagip a K-drama iti amin a panawen, intandudo ti boyish appeal-na ti 37-anios nga aktor nga agbalin a top favorite kadagiti naayat a Filipino fans.
Pagaammo ti aktor gapu iti naisangsangayan nga abilidadna a mangakem iti agduduma a galad ken kababalin dagiti karakter, ti magnetic presence-na iti man screen wenno iti pudno a biag, ken ti naisangsangayan a teknikna iti acting.
Nagadal ni Ji iti performing arts idiay Dankook University, ket di nagbayag kalpasan ti panagturposna, rinugianna ti karerana iti entablado ti musical.
Kababaketan nga atap a billit iti lubong, nagitlog idiay Hawaii iti edadna a 74
Kalpasan ti panagparangna iti adu a supporting ken damo a lead roles, a pakairamanan ti daily drama nga “Smile Again” (2010) ken “Warrior Baek Dong-soo” (2011), dimteng ti breakthrough performance-na iti period drama nga “Empress Ki” (2013), a nangguyugoyannda kadagiti audience iti panagakemna a kas Toghon Temür, ti maika-16 nga Emperador ti Yuan Dynasty.
Sinaruno daytoy dagiti action thriller a “Healer” (2014) ken “The K2” (2016).
Kalpasan ti pannakaleppasna iti military service-na iti pagilianna idi 2019, nagparang kadagiti romcom a kas iti “Backstreet Rookie” ken “Lovestruck in the City,” nga agpada a naipabuya idi 2020 kabayatan ti pandemia.
Nupay kasta, ti akemna iti “The Sound of Magic” (2022) ti nangipakita iti kinasiglatna iti panagkanta, panagsala, ken ti acting range-na. Nagakem ditoy a kas Ri Eul, maysa a misterioso a salamangkero a kayatna ti agtalinaed a kasla ubing iti agnanayon.
Idi met laeng 2022, nagparang ni Ji iti serye a “If You Wish Upon Me,” maysa a healing drama a natiponan iti romance. Iti pabuya, inakemna ni Yoon Gyeo-rye, maysa nga ex-convict a namalbaliw ti biagna kalpasan ti panagboluntariona iti maysa a hospice center.
Nagsubli kadagiti action thriller idi 2023 babaen ti “The Worst of Evil,” a nangipakitaanna iti ebolusionna kas mature actor. Ngakem ditoy a kas Park Jun-mo, iti istoria a napno iti kinasipnget ken kinaranggas. (Joyce A. Ramirez/MB)
