PARIKUTMI a mannalon ti kaadu dagiti waterlily iti Apagonan River iti Aparri, Cagayan ta serraanda ti dalan dagiti agtakuli wenno agbarangay, pababaenda ti lebel ti oksiheno iti danum a kasapulan dagiti lames, agbalinda a pagaayat a pagbalayan dagiti lamok ken uleg—ken lapdanda ti naannayas a panagayus ti danum nga agpabaybay—a makaigapu iti narigat a pannakaabbat dagiti pagtatalonan ken pannakalayus dagiti lugar iti asideg ti karayan.

Pagsayaatanna ta itay napan a tawen, insayangkat ti DTI Cagayan ken ti NIA/NIA-MPIS  (Magapit Pump Irrigation System) a makasakup kadagiti ili ti Lallo, Camalaniugan, Buguey, ken Aparri (Cagayan) ti panagsanay iti panaglaga iti waterlily tapno makissayan dagiti waterlily a manglaplapped iti naannayas a panagayus ti danum iti karayan ken kadagiti drainage canal. 

Malaga ti kayo ti waterlily a kas kadagiti nailadawan.

Panagala iti waterlily iti Apagonan River.

Kastoy ti naisuro kadakami:

Alaen dagiti dadakkelen a waterlily, bugguan a nalaing (sabonan), reppeten ti murdong dagitoy iti sagbebeinte (agbatay iti kayat a kaadu) sa ibitin iti nalinong a paset (saan a maibilag iti init). Kasapulan a ma-airdry laeng daytoy tapno nalaglagda.  Kalpasan ti dua a lawas, mabalinen a lagaen a bag, fruit tray, ikamen, pot holder, tsinelas, pencil holder, kdp.  

Kolum

TULONG ITI MANNALON: Nayon a Balakad Kadagiti Addaan iti Pangganakan a Baboy

Malaksid a makatulong kadagiti nag-training nga inna ta addan mainayon a kuditkuditenda, makatulong pay kadagiti awanan pagsapulan a mangmangged ta magatangen ti kayo ti waterlily.

Pudno a  mabalinen a pamataudan iti pangsupusop iti pagbiag ti pamilia ti waterlily. Adda ngamin dagiti pamilia a pagaayatda dagiti laga a gamigam iti pagtaengan a nakausaran dagiti kabukbukodantayo a materiales isu a kayatda met ti gumatang kadagitoy. --O

(Bannawag, Hulio 1-15, 2023)