AGKURKURANGKA kadi iti pagpakan iti tarakenmo a baboy? Wenno agprobproblemaka iti kinangina ti commercial feeds?
Pakanem man ti baboymo iti bulong ti talinum, kas imbalakad ni Dr. Sean R. Vidad manipud iti MMSU-College of Agriculture, Food and Sustainable Development (CAFSD).
Nangato ti crude protein ken mineral content ti talinum—ken magustuan la ketdi ti baboymo. Ngamin, ti talinum, sidsidaentayo pay a tattao.
Kasla ruot laeng nga umadu ken dumakkel ti talinum. Pagtubuanna uray sadino.
APO ABOGADO (5): Ti Kaso a Sexual Harassment iti Maysa nga Unibersidad
Maysa a klase ti herb ti talinum. Dumakkel agingga iti maysa metro ngem no masansan a maputdan, umadu ti pagsaringitanna. Naberde ti bulongna ken ad-adda a makaawis iti imatang no tumauden ti sabongna. Isu a maar-aramat pay daytoy a kas masetas wenno ornamental plant.
Gapu ta naandur ti talinum iti tikag, adda latta madadaan a pagnatengan ken pangalaan iti pagpakan iti taraken a baboy. Mabalin a presko nga ipakan kadagiti taraken a baboy. Ngarud, alisto nga isagana ken ipakan.
No met para tao, kadawyan a may-steam wenno mai-blanch laeng daytoy tapno mapagtalinaed ti naimas a ramanna. Napintas pay nga ilaok iti ikan ngem siguraduen a saan a maluto a nalaing tapno saan a sumabali ti ramanna ken agbalin a brown ti marisna. Mabalin ketdi nga adobuen a kas iti balangeg (kangkong). Mabalin pay a ma-stir fry karaman ti sibuyas, bawang, kamatis, asin, ken pimienta.
Ngem, ne, dimo sidsidaen amin, a. Mangiteddaka met para iti baboymo. –O
(Bannawag, Septiembre 1-15, 2023)
