Mangisayangkat ti Department of Agriculture (DA) iti agresibo a kampania kontra iti pricing manipulation ti bagas kalpasan ti report maipapan iti mapapati a di maiparbeng a panagganansia ti sumagmamano a traders ken retailers ti bagas.
Iti statement-na ita a Huebes, Dis. 26, kinuna ni DA Secretary Francisco Tiu Laurel Jr. a kalpasan ti panagbisitada kadagiti pagtagilakuan, addaanda iti umdas a rason a mamati nga igaggagara dagiti dadduma a retailer ken traders ti mangsuitsuitik kadagiti consumer a Filipino babaen ti panangusarda kadagiti branded nga imported a bagas tapno maipangato ti presio ti bagas.
Segun kenkuana, maysa a paset ti solusion ti pannakaikkat dagiti brand label kadagiti imported a bagas.
inggunamgunamna pay ti pannakaikkat dagiti label a kas iti “premium” ken “special” kadagiti imported a bagas, a kunana a di umisu ti pannakaus-usar dagitoy tapno maipangato ti presio.
Purchase booklet dagiti senior citizen a gumatang iti agas, saanen a kasapulan
Inlawlawag ti DA a saan a mairaman ti lokal a bagas iti direktiba tapno masalakniban dagiti mannalon a Filipino ken dagiti negosioda.
“Saan a maysa a karbengan ti panagangkat iti bagas no di ket maysa a pribilehio,” impalagip ni Laurel. “No saan a kayat dagiti negosiante a suroten dagiti pagannurotanmi, dimi ida ikkan kadagiti permiso para iti panagangkat iti bagas.”
Segun iti DA, makita iti datos manipud iti rice supply chain nga umdasen ti ₱6 agingga iti ₱8 a markup iti kada kilo manipud iti landed cost ti imported a bagas para iti sustainable profit. Kas pagarigan, ti bagas a naangkat manipud Vietnam iti all-in cost a ₱40 iti kada kilo ket rumbeng a mailako iti saan a nasursurok ngem ₱48 iti kada kilo.
Tapno mataming ti panagbaliwbaliw ti presio ti bagas, kinuna ni Laurel a suksukimatenna ti panangawag iti emerhensia ti seguridad ti taraon iti babaen ti naamendaran a Rice Tariffication Law, a mamagbalin iti pannakairuar dagiti buffer stocks ti National Food Authority (NFA) tapno mapatalged ti presio ti merkado.
Ikonkonsiderar pay ti DA ti pannakaipalubos kadagiti korporasion ti gobierno, kas iti Food Terminal Inc., a direkta nga agangkat iti dadakkel a volume ti bagas tapno makikompetision kadagiti pribado nga importer.
Kasta met, naikkan iti annongen ti legal division ti ahensia a mangtingiting no mabalin a yaplikar ti Consumer Price Act a pangkontra kadagiti aramid a di umisu a panagganansia iti industria ti bagas.
Iti laksid ti addang ni Presidente Marcos a mangkissay iti taripa ti bagas manipud 35 a porsiento agingga iti 15 a porsiento idi Hulio, nagtalinaed a nangato ti presio ti sumagmamano a brand ti bagas, a nangupay nga agpada kadagiti consumer ken iti gobierno.
Kinuna ni Laurel a kitkitaenna pay ti pannakitinnulong ti Department of Finance, partikular ti Bureau of Internal Revenue, tapno ma-audit dagiti pinansial a rekord dagiti negosiante ti bagas tapno masigurado ti pannakatungpal dagiti fair pricing practices. Napusgan met ti Department of Trade and Industry (DTI) tapno ma-monitor ti presio ti bagas kadagiti market ken groseria. (Jel Santos/MB)
