(Pakdaar: Addaan spoilers, basaen laeng no kayat a maammuan ti sumagmamano a detalye ti pelikula)
Aglisika, Charles Bronson ti "Death Wish"; kitaem man, ne, Liam Neeson ti "Taken!" Adda’toyen ni Vilma Santos. Ket gungun-odenna ti titulo ti kina-vigilante star, a mangiparang iti akem ti maysa a naalumamay a balo ken ina nga addaan mision a mangiwayat iti panagibales ken vigilante justice gapu iti pannakarames ken pannakapapatay iti kakaisuna a balasangna. Indirihe ni Dan Villega ti “Uninvited”--ti umuna a full-length feature film-na iti uneg ti innem a tawen, babaen ti screenplay nga insurat ni Dodo Dayao, ken maysa a R-16 MMFF entry.
Maysa a maestra ni Lilia (Vilma Santos) ken kas agladladingit nga ina gapu iti ipapatay ni Lily (Gabby Padilla) nga anakna; akmenna ti kinatao ti pilantropo a ni Eva Candelaria a dumar-ay/mangserrek iti birthday party ti bilionario a ni Guilly Vega (Aga Muhlach) iti nadaeg a mansion daytoy tapno ibanagna ti bukodna a panangiwayat iti hustisia. Ni Guilly ti gagangay a persona a korap, bully, amoral, ‘fat cat’ a bilionario. Mangibagaka iti ania man a saan a mapiansaan a nadagsen a krimen, inaramidnan dayta. Agpada a biktima ti asawana (Mylene Dizon) ken ti balasangna a ni Nicole (Nadine Lustre) ti Stockholm syndrome, ammoda dagiti nakaro a kinaimperpekto ni Guilly ngem agtalinaedda a bulsek ken nasinged kenkuana gapu ta ay-ayatenda unay ti kuartana.
Bayat a maiballaballaet dagiti flashback, iti agdama, mapasamak ti pelikula iti rabii ti birthday party ni Guilly. Adda latta iti aglawlawna dagiti mammapatay a badigoliongna, inikkan ni Aga Muhlach ni Guilly iti panangiparang iti maysa a nadangkok, napangas, managabuso, manangirurumen nga oligarko. Ammona ti ar-aramidenna, nakasagana a mangilemmeng iti kinadakesna, pasuksokanna ti asino man a kasapulan a mapagalisan, ken papatayenna ti asino man a kasapulan a mapagulimek iti agnanayon. No ipagarup ti dadduma a daytoy a katured nga akem ket kabarbaro para ken ni Aga nga ipapan a saan a maibagay iti tipo ken reputasionna kas leading man, malagip nga adda idin inakemna a managdakdakes, maysa a serial killer iti “Sa Aking Mga Kamay” (1996). Ditoy, maysa isuna a nabakbaknang, natalek, ken managabuso a business tycoon, a nakasagana a dagus a makipaset iti kriminalidad.
Ji Chang-wook, manamnama nga ipakitana ti kasasayaatan a panagakemna iti serye a 'Gangnam B-side'
Ket ania ti makunatayo maipapan ken ni Vilma Santos? Asino kadi pay ti makaaramid iti panagrag-o ken panagsipat dagiti agbuybuya bayat ti panangulit-ulitna a mangbagbagkong iti maysa kadagiti badigoliong ni Guilly Vega? Wenno no mamin-ano a papalidpidanna agingga a maungkak ti maysa a pagibalsanna a kriminal?
No magustuanyo ti justice-meted-out vigilante style a namimpinsan a di mangikabkabilangan iti rule of law wenno agkiddaw kadagiti law enforcer nga aramidenda ti trabahoda, daytoy ti perpekto a pelikula ti MMFF a buyaen. Na-enjoy-ko ti nangbuya ken ni Aga a nakaragragsak a makilanglangen ken ni Guilly, ken inapresiarko no kasano nga enteramente a naiduma ti inobra ni Vilma iti daytoy a tukad ti natan-ok a karerana. (Philip Cu Unjieng/Manila Bulletin)
