SEOUL, South Korea (AP) — Maysa a para pasahero nga eroplano ti simgiab ken linamut ti apuy itoy nga aldaw, Domingo, Disiembre 29, kalpasan ti panagsarukigkigna apaman a nagdisso iti maysa nga eropuerto iti South Korea. Maatap a saan a naideploy wenno rimmuar manipud iti eroplano ti akinsango a ligayna, naidungpar daytoy iti maysa a kongkreto a bakud, a nakatayan ti di nakurkurang ngem 124 a tao, iti kuna dagiti opisial a maysa kadagiti kakaruanen nga aksidente iti eroplano iti nasao a pagilian.
Kuna ti National Fire Agency a dagus nga immarayat dagiti rescuer tapno alut-otenda dagiti pasahero manipud iti Jeju Air passenger plane a nagdisso iti eropuerto ti ili ti Muan, agarup 290 a kilometro ti kaadayona iti abagatan ti Seoul. Napasamak ti aksidente iti alas 9:03 iti bigat, oras iti South Korea, addaan ti eroplano iti 181 a pasahero, ken kuna ti Transport Ministry a maysa daytoy nga ag-15 a tawennan a Boeing 737-800 jet a nagsubli iti South Korea manipud iti Bangkok.
Di nakurkurang ngem 124 a pasahero ti natay—57 a babbai, 54 a lallaki ken 13 a sabsabali pay a di ammo ti katataoda bayat a masursurat daytoy a damag. Kuna ti fire agency a dakkel ti posibilidadna a manayonan ti bilang dagiti natay gapu ta di pay nasarakan dagiti dadduma a pasahero innem nga oras kalpasan ti aksidente. (Addan 127 a natay, segun iti kaudian a damag.)
Adda dua a pasahero a nakalasat a naalut-ot dagiti rescuer a kas kuna dagiti opisial nga adda puot dagitoy. Mapan a 32 a fire truck ken sumagmamano a helikopter ti naaramat tapno maiddep ti uram a pinarnuay ti saan a nasayaat a panagdisso ti eroplano. Mapan a 1,560 a bombero, polis, soldado, ken dadduma pay nga opisial ti naipatulod iti nakapasamakan ti aksidente.
Kukua ti TVJ ti trademark nga “Eat Bulaga!”—Court of Appeals
Kinuna ni Lee Jeong-hyeon, hepe ti Muan fire station, iti maysa a televised briefing, nga awan nagmamaayan ti eroplano, a ti laeng ipusna ti nabati. Di pay ammo ti kagagapu ti aksidente nupay kuna ni Lee nga ad-adalenda no dinungpar ketdi dagiti tumatayab ti eroplano.
Kuna ti Transport Ministry a nairaman kadagiti pasahero ti eroplano ti dua a Thai.
Kinompirmar met ni Kerati Kijmanawat, direktor ti Airports of Thailand, babaen ti maysa a pakaammo, a nagluas ti Jeju Air flight 7C 2216 manipud iti Suvarnabhumi Airport nga awan met ti naireport nga ania man a parikut mainaig iti eroplano wenno iti runway ti eropuerto. (Associated Press/ Manila Bulletin)
