LAOAG CITY, Ilocos Norte – Inreport ti Ilocos Norte Provincial Disaster Risk Reduction and Management Office ti kaadda dagiti nadadael iti probinsia gapu iti 5.6-magnitude a ginggined a napasamak idi Lunes.

Kinuna ni Ilocos Norte PDRRMO head Marcel Tabije nga inreport ti MDRRMO-Sarrat a nakakitada kadagiti rikki iti diding ti Santa Monica Church iti nasao nga ili. Malaksid itoy, adda pay dagiti rikki iti akinruar a paset ti diding ti simbaan ken adda dagiti natnag iti uneg ti simbaan.

Mainaig itoy, inrekomendar ni MDRRMO-Sarrat officer Marvin Ganal a maangay pay laeng ti misa iti garden ti simbaan para iti kinatalged dagiti pumarokia. Nabalakadan met dagiti bisita ken deboto nga agannadda koma no bilang sumrekda iti simbaan.

Kinuna ti administrador ti simbaan a nayiskediul a matarimaan ti simbaan iti daytoy nga Enero. Ti National Historical Commission of the Philippines (NHCP) ti nangpondo iti pannakatarimaan ti simbaan. 

Lokal

Kapitan ti barangay iti Isabela, pinaltoganna ti maysa a mannalon

Maysa nga establisimiento iti Ilocos Norte a naaddaan iti dadael gapu iti ginggined a nangdayyeg iti probinsia idi Lunes, Disiembre 30, 2024. (Freddie Lazaro)

Napattapatta a mapan a PhP2-milion ti pateg ti nadadael iti simbaan.

Adda met naireport a di unay a nakaro a nadadael iti maysa a shopping mall iti San Nicolas, Ilocos Norte, iti maysa a pasilidad ti gobierno iti Bangui, ken iti maysa a balay iti Barangay Baduang, Pagudpud.

Kinuna ni Tabije a maitultuloy ti panagsukimat ti opisinada no adda pay dagiti nadadael gapu iti ginggined. (Freddie Lazaro/ Manila Bulletin)