NAGANAK ni Athena, ti shih tzu nga aso ti anakko. Damona ti aganak ket dina ammo ti agiddek. Kapilitan nga intaraymi iti beterinario. Na-caesarian. Dina nalasat ngem nakalasat ketdi ti anakna.
Nairana idi a naganak met ni Cassie nga asok, maysa met laeng a shih tzu. Impanko ti anak ni Athena iti karton a yan dagiti annakna. Ngem dina kayat a pasusuen ti anak ni Athena. Nagmalem a kasta.
Gapu iti daytoy, kinasarsaritak ni Cassie; inap-aprosak ti ulona. Impakaasik a pasusuenna ti anak ni Athena. Inkarik pay kenkuana a minalem nga igatangak iti barbeque ken American bread a paboritona. Kitkitaennak ni Cassie. Sa kitaenna ti uken ni Athena. Binagkatko ti uken sa impasusok kenkuana. Sinintirko no kagura ni Cassie. Saan metten ta nagtalnan ken pinasusonan ti uken nga anak ni Athena.
Ngem kasanon no awan aso a nairana nga aganak? Wenno no adda man naganak, dina met kayat a pasusuen ti uken? Kasano nga agbiag ti uken?
APO ABOGADO (5): Ti Kaso a Sexual Harassment iti Maysa nga Unibersidad
No di koma latta kayat a pasusuen ni Cassie ti anak ni Athena, kapilitan koma nga impanko iti beterinario tapno damagek no ania ti maikanatad a gatas a para iti kayanak nga uken ken no ania a mamador ti mayataday iti daytoy.
Nasken met a maala ti dagsen (weight) ti uken iti inaldaw. Amirisen no dumagdagsen daytoy. No saan a dimmagsen iti unos ti dua nga aldaw, itaraymon daytoy iti kaasitgan a beterinario tapno mapakatan iti suero wenno ania man a remedio tapno masalbar ti uken.
Yadayo ti uken iti yan ti ina nga aso a naganak wenno kadagiti dadduma pay nga aso a saan a naganak tapno maliklikan iti ania man a bayrus wenno impeksion ta amangan no adda impeksion dagiti dadduma nga aso. Mabalinto la a yasideg ti uken kadagiti dadakkel nga aso no addan 5-6 a lawasna.
Nasken met naimeng ti lugar ti pangipanan iti uken a kayan-anak. Nasayaat no adda karton ken ap-apan daytoy iti nalamuyot a lupot. Inaldaw a sukatan ti ap-ap. Nasken met a saan a makaruar ti uken iti uneg ti karton. Saan a rumbeng nga agkarayam ti kayanak nga uken iti semento wenno iti daga.
No mairana a nalamiis ti panawen, ikkan iti bombilia iti asideg ti uken tapno agserbi a mangpabara iti bagina.
Narigat ti agtaraken iti uken. Ngem no mabiagmo ti uken nga ulila iti ina, maibilang metten a maysaka nga ina nga igget dungngo. Sigurado a kabaelam met ti mangtaripato iti pudpudno a beybi. --O
(Kameng ti autor iti Batac City Dog Enthusiast, grupo dagiti agtartaraken iti aso iti Siudad ti Batac.)
(Bannawag, Peb. 1-15, 2024)
