ADDAN sumagmamano a tawen nga agtartarakenak iti aso. Ket adda dagiti alagaden nga ipatpatungpalko no kasano a patanorek dagiti babassit pay nga uken aglalo no saan nga aspin dagitoy.
Wen, a. Uray panagpadigos, adda wagas a sursurotek aglalo kadagiti uken a damoda ti madigos.
Umuna, nasken nga amin a kasapulan iti panangdigos iti uken, adda iti asideg ti lugar a pangdigosan. ‘Tay magaw-atmo, saankan nga umadayo. No ngamin adayo dagitoy, ad-adu ti gundaway nga itarayannaka ti uken. Obramto manen ti mangkamkamat ken mangtiltiliw iti daytoy. Isu a sakbay nga agpadigoska, isagana ken yasidegmo iti pagpadigosam dagiti kasapulam a kas iti dog shampoo, pin brush a para iti babassit pay nga uken, sagaysay ti aso, pangsagepsep (absorbent) a tualia, bassit ken nalamuyot a labakara, hair dryer, ken ania man nga itedmo a gunggona iti uken. Nasken nga adda gunggona ti uken tapno saanto a mabuteng iti sumaruno a panangdigosmo. Pampanunotenna ketdi nga adda gunggonana kalpasan a madigos.
No plano nga ikukuan ti uken, isagana ti nail clipper ket yasidegmo met iti yanmo nga agpadigos. Nasken met a mild dog shampoo ti usaren. Saanka nga agusar iti shampoo ti tao ta mabalin a madangran ti kudil ti aso. Naapges pay iti matada daytoy.
APO ABOGADO (5): Ti Kaso a Sexual Harassment iti Maysa nga Unibersidad
Maikadua, isagana ti lugar a pangdigosam iti uken. (Mabalin a padigosen iti lababo. Ngem nasaysayaat a mairuam ti uken a madigos iti uneg ti banio.) Isagana met ti rubber mat a pangidissuam iti uken. Nasayaat nga adda rubber mat a pangidissuan tapno saan a gumalisgalis ti sakana iti sementado a suelo. Nasken pay a nadalus ti lugar a pangdigosan iti uken. Ipakni dagiti sabon ken shampoo ti tao. Nasken met a saan a nagalis ti banio ta amangan no maikagliska. No nadalusen ti suelo, yaplag ti rubber mat.
Maikatlo, mangisagana iti dua a cotton balls. Isullat dagitoy iti lapayag ti uken tapno maliklikan ti pannakatubong daytoy. Saan nga iselsel unay, daytay kalkalainganna laeng. Ken in-inayaden nga iselsel.
Maikapat. Sakbay a babasaen ti dutdot ti uken, nasken a sagaysayen daytoy aglalo no shih tzu wenno napuskol ti dutdotna. Inayaden laeng a sagaysayen. No adda nasirut a dutdot ti uken, saan a puersaen a sagaysayen. In-inayaden a kartiben daytoy.
Maikalima. Babasaen ti dutdot ti uken babaen ti kalkalainganna ti kalamiis ken kabara a danum. Unaen a babasaen ti bagi ti uken. Liklikan a mabasa ti rupana. No kabutengna ti mabuyatan iti danum babaen ti panangusar iti tako, nasaysayaat nga agusar iti shower. No awan shower, agusar iti tako nga adda abut-abutna. Kalpasan a mababasa ti dutdot ti uken, ikkanen iti dog shampoo. Inayaden laeng a yapros iti bagi iti uken. No naglabutaben, i-brush iti bagina. Mangrugi iti tengnged sa ipababa agingga iti ipus. Imasahe ti sabon iti buksit ken ipusna. Kalpasanna, pagsusublaten a sabonan dagiti saka ken dapanna. Laglagipen a liklikan a masabonan ti rupana. Inton namnamaem a naikkaten ti rugit ti bagina, balnawanen.
Isaruno nga ikkan iti conditioner ti dutdot ti uken. Isapsapo daytoy iti sibubukel a bagina. Kalpasanna, balnawan manen. Isaruno ti mangbabasa iti bassit a nalamuyot a labakara. Yapros daytoy iti rupa ti uken. Kamaudiananna, punasan ti mabagbagi ti uken babaen met laeng ti nalamuyot a labakara.
Maikanem ken maudi, punasan ti uken babaen ti nalamuyot ken agsagepsep a tualia. Inayaden laeng a yapros ti tualia iti bagi ti uken. Kalpasan a mapamagaan bassit ti dutdot ti uken, iruaren iti banio. Pamagaan a nasayaat ti dutdotna babaen ti dog hair dryer. Liklikan nga ipaturong ti dog hair dryer iti rupa ti uken. Sagsagaysayen ti dutdot ti uken kabayatan ti panang-hair dryer. Inton namagaan ti dutdotna, baduanen daytoy.
Ita, saankan nga agbutbuteng a mangdigos iti ukenmo. Padasem ti wagas nga ar-aramidek. Basta laglagipem a nasken nga addan dua a bulan ti uken no damona ti madigos.—O
(Kameng ti autor iti Batac City Dog Enthusiast, grupo dagiti agtartaraken iti aso iti Siudad ti Batac.)
