(Tuloyna)
DAYDIAY DOUBLE TREE SUITE idiay downtown Salt Lake City ti nakaitarusanmi, dakami a naggapu idiay Filipinas. Uray adda jacket-ko, kaslaak la mayup-uper iti yelo idi makadanonak iti hotel.
ALLON TI BIAG: Walo A Dekada A Panagdaliasat (36)
Agassideg ti kuartomi iti daydi maysa nga Stake President a naggapu idiay Bacolod, nalipatak metten ti naganna; malagipko laeng ta nadadael ti tianna iti dina nakairuaman a taraon. Idiay Salt Lake Tabernacle ti nairanta a pakaangayan ti kombension.
Iti panagur-urayko a sumrek, ta napekpek ti Salt Lake Tabernacle, adda nangkablaaw kaniak.
“Brother Tabin, glad to see you!”
“President Henderson!”
Agasem, diak impagarup a masagangko daydi Stake President idiay Arabian Peninsula Stake.
Ket agpadakamin iti akem iti simbaan. Naammuak idi agangay, nga aduda nga agkakabagian a nagbalin nga Stake President iti Utah.
Saan a nalaon ti Salt Lake Tabernacle dagiti immatendar isu a kapilitan nga impanda dagiti dadduma iti Assembly Hall a kaabayna met laeng—isu nga idi agangay, binangonda ti Conference Center iti ballasiw ti kalsada iti amianan.
Sakbay a napanak idiay San Jose a nagtulaganmi iti daydi Anti Rosa a dumagasak sakbay nga agawidak idiay Montalban, pinadaw-asnak pay ni Brother Luis Delfin idiay Idaho a yanna idin.
Malagipko ita, nga adda intugotko a panakkelen a karton a yan dagiti tagilakok a libro.
Napanunotko ngamin nga adu ti Ilokano idiay California isu a nangitugotak.
Nakalamlamiis met iti yan ni Brother Delfin iti asideg ti Snake River idiay Idaho. Siak ti pinangusarna iti daydi kakaisuna a heater-na. Pinabalonannak iti $50.00 idi agsinakami iti kabigatanna.
Uray no nadagsen daydi karton a yan ti libro, nangnamnamaak a makalakoak idiay San Jose.
Greyhound ti bus a naglugluganak.
Addan sa man uppat a kopia a nalakok iti librok a Pakpakawan, Berde! Pinaibati daydi Anti Rosa dagiti di nalako ket inkarina nga ipaw-itnanto ti paglakuanna.
Kalpasan daydi a komperensia, diak ammon ti kudkudek iti kaadu ti pagrebbengan a sanguek. Ad-adda nga immingetak iti pamiliak. Diak sinardayan nga impaganetget kadakuada a dida mangipakpakita iti pakababalawak, ken dida mangliwliwat iti simbaan. Malaksid iti maminsan iti makalawas a panagmimiting dagiti miembro ti konseho iti Stake, nagtutulaganmi a tallo iti Stake Presidency a pagsisinnublatenmi a sarungkaran dagiti walo a Ward ken Sanga. Isu a linawas a saggaysakami ti sarungkaran. No kasapulan, mangtedkami iti mensahe, nangruna no adda napateg a pakaammo ti First Presidency manipud iti Salt Lake City.
No adda idi agngayangay nga agmision, masapul a magna iti nainget nga interview, umuna ti Bishop wenno iti Branch President. Maudi ti Stake President. No dadduma, no awan ti panawenko iti Stake Center, awisekon ti kandidato iti PHCA ket idiay ti pangpalutpotak iti oras a kaawan ti parokiano. Masapul a nadalus ti puso ken konsensia ti agngayangay nga agmision, kangrunaanna ti Law of Chastity.
Naminsan, adda maysa a taga-Marikina a pinalubosak. Bayat ti interview, pinennekko a mangted iti maudi a pangngeddeng, ken no sadino ti pakaidestinuan ti misionario.
Sayang daydi nga ubing. Tallo a bulanna la iti mission field, nagsublin—gagangay a dua a tawen ti kapaut ti lalaki a misinario, sangapulo-ket-walo a bulan dagiti babbai.
Adda gayam balasang a napanawanna ket dina maipamaysa ti panunotna iti obligasionna.
Adda daydi naminsan a yaay iti trabahok, imbes nga iti opisinak idiay Stake, ti maysa a misionario a nakun-osnan ti misionna, tapno i-release-ko. Maganatan unay nga agpasiar. Dida mabalin ti rummuar nga agmaymaysa a di mai-release nga umuna, kanayon latta nga adda kaduada, kas iti dida pannakabalin nga agmaymaysa a rummuar no mapanda mamalaybalay a mangisuro.
Sakbay man a mapanak iti sabali a topiko, isingitko ti kellaat a nagparang iti mugingko: maipanggep iti scripture chase a tinawen a maar-aramid idi iti Simbaan.
Nagsaruno da Dondon ken ni Mimi a nangabak iti Scripture Chase. Idi panawen ni Dondon, New Testament ti napagsasalipan ket anak daydi Elder Lim nga immuna nga Stake President ti Marikina ti nakasalipna iti finals. Siak pay la ti Stake President idi ket diak nagawidan ti riknak a nangidir-i kenkuana, a di koma rumbeng nga inaramid ti kas kaniak iti anakna.
Imbagana iti namainsan a pannakalagipmi iti daydi a pagteng, nga adda technique nga inaramidna. Sakbay a rugianda a sapulen ti naibaga a sapulenda iti scripture, maibilin nga iparabawda ti dakulapda iti scripture. Imbes nga intalmegna ti libro, imbatogna laeng dagiti dakulapna tapno saan nga agdedekket dagiti panid, idinto a sungani ti inaramid dagidi kalabanna. Intalmegda pay ti libro, a narigrigat no kua a lukiben ta agrerekket dagiti panid.
Ni Mimi, Doctrine and Covenants ti nagsasalipanda iti sumuno a tawen. Nangabak met!
Saan a nalaka ti agserbi a presidente ti estaka. Adu ti parikut kadagiti Ward ken Branch a di kabaelan a solbaren dagiti Bishop, a masapul a tamingen dagiti adda iti Stake. Pagarigan daydi babai a miembro ti maysa a Ward ti Marikina a masapul nga agdayalisis iti linawas; saan nga ang-angaw ti magasto iti kasdi a sakit, nasurok a sangaribu iti maminsan, saan a kasla ditoy America a dakkel a katulongan ti masakit ti medical insurance a mangyabaga iti dakkel a kantidad. Gapu ta awan ti kuarta daydi pasiente, nagkamangda iti Ward, a gapu iti adu a tultulonganda, inyamang met ti Ward kaniak, ket gapu ta awan met ti umdas a kuarta ti Stake ta agpaay laeng iti aktibidad dagidi nadumaduma a sangana, inyamangko iti opisina ti Area Presidency iti PBO, ta isu ti bilinda kaniak.
No kasdi a mapmapanak, malabasak ti opisina ti PBO, ket kanayon a pangpangngegannak daydi kabsat a Micairan.
‘O, nandito si President Tabin...’ adda awengna a mangin-insulto. Kayatda ngamin ket isuda ti asitgam, saan a ti Area Presidency. Ania ngarud ket isu met ti bilinda kaniak?
Nalag-an ti rikna no makatulongka ket daydi ti nangpatpatibker iti pakinakemko nga agserbi.
Ken adu pay ti banag a nasken a risuten ti presidente ti estaka; saankon a maagapad amin ditoy. No nalpasen ti linawas a mitingmi iti rabii, parikutko pay ti panagawidko. Kadakami a tallo iti Stake Presidency, siak la ti awan ti kotsena, ket masapul nga ag-roundtrip-ak—malagipyo ‘tay kunak? Tapno makaawidak iti dis-orasen ti rabii.
Ngem saanak a nagrekreklamo. No nakaiddaakon iti rabii, agawen ti turog ti laglagipko kadagidi napalabas a nagdaldaliasatan ‘toy numo.
A, wen gayam, idi nagsukat ti panguluen ti Stake Relief Society Presidency, insingasing dagidi kakaduak nga alaenmi a maysa kadagiti miembro ti Presidency ni Sinamar. Kunada pay nga isu ti ipatugawmi a presidente. Ngem nagkedkedak, ket impanmi laeng a First Councilor. Ni Sister Hubertalina Camba ti Cubao Ward ti napusgan a presidente; maysa met nga Ilokana nga agpada a daydi Northern Luzon Teachers College idiay Laoag ti nagadalanda. Taga-Marikina ti impatugawmi a Second Coouncilor.
Bayat ti pannakakumikomko kadagiti pagrebbengak iti Simbaan, makumikom met ni Sinamar iti rebbengenna iti eskuela, iti simbaan, ken iti balay. Malagipyo daydi nakunakon? Tapno adda panglitupmi kadagiti paggastuanmi, nasumokanna ti aglakulako iti uray ania ditan. Mapan agangkat iti ginasut nga itlog ti pugo idiay Montalban no sumangpetda iti malem. Lingtaenna, tumultulong met da Chichi nga agpili kadagiti buong ta saan a malako ket amano nga isakmolda. Naglutluto pay iti crispy dilis a timmultulongan ni Chichi. Uray ti tosino, sinerrekna nga ilako. Inayabanna ni Sister Marilou Millan nga aglako. Malas ta impautang ni Sister Marilou Millan ti impailakona ket saan a nagbayad ti nangipautanganna.
Ti maganansiana ti pangal-alaanna idi iti pagpleteda..
Wen gayam, gapu iti panaglaklakona iti itlog ti pugo idiay eskuelada, pinanaganan dagidi co-teacher-na iti Mrs. Pugo.
Ni Chichi ti kaanepanda a timmultulong isu nakasursuro nga agluto. Ni Lingling, awan ti inaramidna no di mangsaksaklot iti journal a pagsursuratanna iti diak ammo no ania.
Tapno makasalimetmetda iti pleteda, agsisinnaklotda. Idi kuan, agreklamodan. Idi kuan, inyakar ni lelangmo ni Chichi iti Montalban. Ni Lingling ti intultuloyna ti nagbasa idiay UP Integrated School, a nangrugianna idi addakami pay la idiay Amorsolo ta adda idi pribilihio dagiti empleado ti UP a kas kaniak. Naimbag ta iti Burgos Elementary School iti Montalban ti nakabatian ni Jojo nga agbasa. Ni Dondon ti nabati idiay Quirino ta adda idi iti SPED. Isu idi ti kasiribanda nga agkakabsat ta nairamraman a nakisalsalip iti Spelling Bee... Ken nagturpos iti Quezon City High School...
Dandani ngatan malpas ti rebbengek iti PHCA idi makaawatak iti pakaammo ti PBO wenno Presiding Bishopric Office a makasapul ti Simbaan iti agipatarus kadagiti libro ti pammati, kas iti The Book of Mormon. 1989 idi. Daydi ngata ketdi Bro. Gapis a pangulo idi ti PBO ti nangpaawag kaniak. Diak maitudo no asino ti nakaammuan ti PBO a mannuratak iti Ilokano; diak ammo no daydi Brother Tan wenno daydi Brother Bala.
Impakitada ti naipatarus a napili a paset ti Libro ni Mormon. Ladingitek nga ibaga, a saan a nagaw-at ti nasao a patarus ti umno a pannakaipatarusna a maibatay iti umno a panagsurat iti Iluko. Isu a siak ti tinudingan ti PBO a mangipatarus iti sangabukel a Libro ni Mormon. Adu ti nangimaton: Ed Borrup, Curtis Parker, ken John Ball. Namainsan, immay iti PBO ni David Frischknecht a manager ti translation department idiay COB iti Salt Lake City. Insurotdak ken ni Bro. Gapis idiay Bulacan a nangsarungkar kadagidi dadduma nga agipatpatarus. Mabisin ngata unay ni David ta dandani binukodanna ti sangabukel a pizza!
Idi kuan, natudingan daydi Remi Mataoa a superbisor iti Filipinas. Nagyanda iti pamiliana iti Filipinas iti tallo a tawen.
Binukel ti innem ti Ilokano team. Siak ti translator. Da Sinamar ti reader, a mangusig kadagiti biddut, a kaduana da Grace Baradi Baay, Lilian Diaz San Diego, Sister Manlogon. Ket daydi Hernelio Baradi a kabsat ni Samar ti reviewer.
Idi nalpas ti nasao a libro, insarunomi ti Doctrine and Covenant (Doktrina ken Katulagan), sa ti Pearl of Great Price (Perlas a Kapatgan). Kalpasanna, simmarunon ti adu pay a pagbasaan ti simbaan, sabali la dagiti nailadawan nga estoria.
Kadagidi a panawen, dumakdakkelen ti bilang dagiti miembro iti Montalban. Napagnunumuan dagiti nangangato a panguluen ti Simbaan a panawenen a mabangon ti baro a distrito manipud iti Marikina Philippines Stake. Ti Montalban ti naitudo a pakabangonan ti baro a distrito. Masapul nga adda madutokan a baro a District President, ket kaipapananna a maikkatakon a presidente ti Marikina Philippines Stake ta saanakon a kameng iti dayta a lugar.
Uppat a sanga ti nabukel a mangbukel iti Montalban District. Burgos Branch, Manggahan Branch, San Rafael Branch, ken maysa pay a sanga ti indauluan daydi Brother Cruz.
Daydi Brother Jose P. Gisala ti napili a presidente ti distrito babaen ti binnutosan—saan a kas idi siak ti napili a presidente ti Marikina Philippines Stake, a no asino ti ‘itudo ti Nailangitan’ babaen ti kararag isu ti mapili.
Siak ketdi ti napili a presidente ti baro a Burgos Branch. 1st Councilor-ko ni Bong Delfin ken diak malagipen daydi 2nd Councilor. Intultuloyko ti nagserbi a Sealer idiay Manila Philippines Temple.
Adda dagidi baro a parikut a naipasango kaniak kas Branch President. Maysa a miembro ti nagaplikar nga agmision. Kas padasko, nasken a nadalus ti aplikante tapno makapagmision. Ngem sakbay a nagna kaniak, inaprobaran ti District President, a panagkunak, dinan pinalutpot no ‘nadalus’ met laeng ti aplikante. Pinirmaanna lattan ti aplikasion.
Ngem idi pinalutpotko daydi aplikante, impudnona nga adda ‘nagarawna’ a balasang. Dakkel a NO, NO daydi. Nasken a surotenna ti Law of Chastity. Diak pinalubosan. Inikkak iti innem a bulan a pawayway nga ag-repent. A no pampanunoten, ababa unay daydi intedko a panawen. Impagpagapuk laeng iti naaramid a biddut ti immuna a nang-interview. Naawatan daydi mannakaawat nga ama ti agngayangay a misionario, ket inawatda a sipupuso ti pangngeddengko.
Ngem nagbalin a dakkel a kasok daydi nga inaramidko iti imatang daydi Mission President Hyatt, nga akin-iggem iti Distrito. Diak maawatan no apay a binabalawnak ket nalawag ti annuroten ti Simbaan. Idi nagsasarakkami idiay Provo Missionary Training Center a panangitulodmi no saan a ni Jojo, ni Chichi, kalpasan ti adu a tawen, nadlawko ti nalidem a rupana idi kinablaawak.
Nai-release-ak a Branch President ti Burgos kalpasan daydi a pasamak, idi Marso 4, 1994. Ti rasonda, total agpapaayak metten a Sealer idiay Manila Philippines Temple.
IDI MALMALPASEN TI Ilokano team ti panagipatarusmi, nasao ti Bannawag nga adda proyekto daydi Apo F. Sionil Jose, ti akinkukua iti Solidarity Foundation, a makasapul iti translator iti libro a ganggannaet. Itoy a gundaway, Filipino wenno Tagalog, saan nga Ilokano. Naipaima kaniak ti "The River With No Bridge (Ang Ilog Na Walang Tulay)" ni Sue Sumii. Malagipko man ketdi ita, nga adda met pagsayaatan ti saan la a maymaysa a lengguahe ti ammo; pinaraburannak ti Apo a Mannakabalin iti tallo a lengguahe.
Inawisnak pay daydi Manong Jun Hidalgo nga agipatarus iti sumagmamano kadagiti awatna a libro ti Aleman.
Makita amin dagitoy iti bibliograpia a nairaman iti libromi ken ni Sinamar nga "Ubbog ti Sirmata (Wellspring of Foresight)."
Diak met binaybay-an ti ‘nagramutak’ nga aramid, ti kinamannuratko. No adda panawenko, ken no adda mitmiting ti GUMIL Metro Manila, saanak a naaw-awan. Agingga nga iti maysa a pannakapili ti sumaruno a panguluen ti gunglo, siak ti napili a presidente—maysa a butos ti nangabakak ken ni Honor Cabie, ti la butos ni Sinamar! Kalpasan ti tallo a tawen, saaanakon a nagkandidato. Nagbalinak laengen nga Ex-Oficio Director, wenno lifetime member.
Idi kuan, inawisnak ni Brother Gapis a Translation Coordinator. Nagay-ayatak, a, ta kaipapananna ti idudur-as ti saadko. Sinarungkarak dagidi translator ti Ilokano idiay Pangasinan, San Fernando, La Union, ken Laoag; Cebuano idiay Cebu, Bicol idiay Samar; Bacolod, Albay...
Sakbay nga inawatko ti awis ni Brother Gapis, inkeddengko nga aglusulosak iti PHCA. Adda ngamin idi marikriknak a problema. Ken impagarupko no agbayagak a kas Translation Coordinator.
Ngem saanak a nagpaut iti daydi a trabahok. Naibaga kaniak a saandakon a masapul iti PBO. Diak nagreklamo. Binabalawko ti bagik ta nangeddengak nga aglusulos idiay PHCA.
Nagsapulak iti pangisuruak. Nakastrekak nga Instructor iti Ateneo de Manila University, ken iti UP Diliman gapu kadagidi kontakko, ken gapu iti nakaklaseak iti Masteral a natalged idin ti puestoda kadagidiay nga unibersidad.
Kamkamatek idi ti orasko, nangruna idi naawaganak nga agserbi iti Manila Philippines Temple, kas Ordinance Worker, nga idi agangay, inaramiddak a Sealer.
Agluganak iti dyip a lumabas iti Ateneo, magmagnaak a sumrek iti napanayag a kampus ti unibersidad. Pilipino Literature ti insurok idiay. Babaknang amin nga estudiante. Braboda.
Naminsan, kinasaritanak ti maysa nga estudiantek a nakalabas kaniak a magmagna.
“Sir, saan ang wheels n’yo?” dinamagna.
Diak nakasungbat a dagus. Ngem kinunak met laeng:
“Huh, wala...”
Sabali nga aldaw ti panangisurok iti UP Diliman. Bigat.
No aggapuak kadagidi a nangisuruak, agtarusak iti templo.
(Adda tuloyna) :https://bannawag.mb.com.ph/2025/01/07/allon-ti-biag-walo-a-dekada-a-panagdaliasat-35-2-6724/
