Pimmusay ni Undersecretary ti Department of Agriculture (DA) Deogracias "DV" Savellano iti edadna a 65 itoy nga aldaw, Enero 7, gapu iti abdominal (aortic) aneurysm.
Naipasngay idi Nobiembre 25, 1959 iti Cabugao, Ilocos Sur kada dati a mayor ti Cabugao ken dati a Chairman ti Commission on Elections (COMELEC) Victorino Savellano ken Virginia Barbers.
Tinurposna ti bachelor's degree-na iti Economics iti University of the Philippines ken nagbasa pay iti California, U.S.A. a nakagun-odanna iti master's degree-na.
Nangrugi a nagserbi iti publiko ni Savellano kas Bise Mayor ti Cabugao manipud 1981 agingga iti 1987. Nagpaay a kas Gobernador ti Ilocos Sur iti dua a termino manipud 2001 agingga iti 2004 ken idi 2007 agingga iti 2010; ken kas Bise Gobernador ti isu met laeng a probinsia manipud 1988 agingga 1992, sa manen idi 2010 agingga 2016.
Mayawiden ti bangkay ti napapatay a Filipina iti Slovenia, segun iti DFA
Nagserbi ni Savellano a kas Diputado ti 1st District ti Ilocos Sur idi 2016, ken idi 2019. Bayat ti panagakemna a kas Diputado, natudingan ni Savellano a kas maysa a Deputy Speaker iti Kamara.
Idi Hulio 23, 2023, dinutokan ni Presidente Ferdinand Marcos Jr. ni Savellano a kas Undersecretary for Livestock ti DA.
Inkallaysana ni aktres a Dina Bonnevie idi 2012. (Bannawag News Team)
