Dakkel ti posibilidad a lumaka ti kamatis inton Pebrero, segun iti maysa nga opisial ti Department of Agriculture (DA).
Iti panang-monitor ti DA idi Enero 4, naammuan nga adda iti baet ti PhP200 ken PhP300 ti kada kilo ti kamatis kadagiti tiendaan iti Metro Manila. Adda pay report nga adda agilaklako iti PhP400 kada kilo iti dadduma a lugar iti National Capital Region (NCR).
Inlawlawag ti panakangiwat ti DA a ni Assistant Secretary Arnel De Mesa a dagiti nagsasaruno a bagyo idi napan a tawen ti nangpangina iti kamatis, ta dinadael dagiti bagyo dagiti mula a kamatis isu a bimmassit ti suplay ti kamatis iti 45 a porsiento iti maudi a paset ti 2024.
Innayon ni De Mesa nga agsubli ti dati a kaadu ti suplay ti kamatis ita a bulan agingga iti Pebrero a panangrugi ti kalgaw. Manamnama met a lumakanton ti kamatis. (Jel Santos/Manila Bulletin//Lito Hilidon/Bannawag)
