Nasursurok ngem 6.5 a milion a deboto ti Nangisit a Nazareno ti maekspektar a dumar-ay iti Traslacion wenno libut a maangay iti Siudad ti Manila inton Huebes, Enero 9, segun iti National Capital Region Police Office (NCRPO).
Kinuna ni NCRPO Director Brig. Gen. Anthony A. Aberin a nakaipasdekdan kadagiti pamuspusan tapno matimon ti seguridad ken nangipatuloddan iti umdas a bilang dagiti polis tapno masigurado ti natalna ken naurnos ti napaut a libut.
Idi napan a tawen, mapan a 6.5 a milion a deboto ti dimmar-ay, ket patpattaen ti NCRPO nga ad-adu ti umay a tao ita a tawen.
Nasurok a 14,000 a kameng ti NCRPO ken nayon a puersa manipud kadagiti dadduma a rehion ken ahensia ti agbantay iti Nazareno 2025. Aganay a 1,300 a polis ti aggapu iti Central Luzon Police Regional Office 3.
Pannakapapatay babaen ti firing squad dagiti managkunniber nga opisial ti gobierno, indagadag ti maysa a diputado
Kinuna ni Aberin a nainget ti paglintegan nga ipatungpalda iti Siudad ti Manila, manipud iti pannakaipatungpal ti gun ban a mangrugi inton Enero 8 ken ti pannakaiparit kadagiti bag, payong, arak, paltog, agraman agtagtagilako iti asideg ti Quiapo Church.
Iti sabali a bangir, indagadag ti EcoWaste Coalition kadagiti deboto a yebkasda ti pammatida ken ni Jesus Nazareno babaen ti dida panagibati iti basura kadagiti lugar a malabsan ti libut. (Aaron Recuenco/Manila Bulletin//Lito Hilidon/Bannawag)
