Binallaagan ni Sekretario ti Department of Agriculture (DA) Francisco “Tiu” Laurel Jr. dagiti aglako iti PhP60 kada kilo ti imported a bagas idi Lunes, Enero 6, ta labsingen daytoy ti linteg a mangsalaknib kadagiti kustomer.
Kinuna ni Laurel a maibilang a pananggundaway wenno nalabes a panagganansia (profiteering) ti panaglako iti PhP60 kada kilo ti imported a bagas.
Segun ken ni Laurel, kalpasan ti panangsarungkarda kadagiti nadumaduma a tiendaan, napaneknekanda a dagiti dadduma nga agtagtagilako ket igaggagarada nga al-allilawen dagiti aggatgatang babaen ti panangusarda iti branded imports tapno maipangatoda ti presio ti bagas.
Kas paset ti solusion, imbilin ni Laurel ti pannakaikkat dagiti "branded" a marka dagiti imported a bagas, kasta met ti "premium" ken "special" a marka ti bagas kadagiti tiendaan.
Maibatay iti datos ti DA, PhP6 agingga iti PhP8 kada kilo ti nainkalintegan a mainayon iti presio ti naangkat a bagas tapno agganansia dagiti agtagilako. Kas iti naangkat a bagas iti Vietnam a nagatang iti PhP40 kada kilo, mailako iti tiendaan iti di nasursurok ngem PhP48 kada kilo.
Petision ni Manases Carpio kontra iti kaso nga impeachment ni VP Duterte, inlaksid ti korte
Tapno malapdan ti panagngato latta ti presio ti bagas, kinuna ni Laurel a mabalin a maideklarar ti food security emergency maibatay iti naamendaran a Rice Tariffication Law, tapno mapalubosan ti National Food Authority (NFA) a mangiruar iti lebbenda a bagas tapno ma-stabilize ti presio ti bagas iti merkado. (Jel Santos/Manila Bulletin//Lito Hilidon/Bannawag)
