Patien ni Sekretario ti Department of Transportation (DOTr) Jaime Bautista a saan a maapektaran ti election ban dagiti dadakkel a proyektoda para iti impraestruktura.
Daytoy ti impasigurado ni Bautista kadagiti kameng ti prensa itay Enero 7, ket kinunana nga agtultuloy latta dagiti proyekto ti DOTr ta narugianen dagitoy sakbay pay ti election ban.
Inkeddeng ti Commission on Elections (Comelec) a mangrugi ti panawen ti eleksion 2025 inton enero 12 agingga iti Hunio 11, idinto mangrugi ti panagkakampania inton Pebrero 11 agingga iti Mayo 10.
Ngem iparit ti Omnibus Election Code, wenno ti Batas Pambansa Bilang 881, ti pannakairuar, pannakaiwaras, wenno panaggasto ken ti panangpatakder ken pannakaited dagiti materiales para iti public works 45 nga aldaw sakbay ti panagbobotos. Itoy a tawen, naiparna dayta iti Marso 28.
Mayawiden ti bangkay ti napapatay a Filipina iti Slovenia, segun iti DFA
Itay napalabas a bulan, inlaksid ti Comelec dagiti 48 a proyekto para iti impraestruktura nga adda iti sidong ti Public-Private Partnership (PPP) Center iti election ban.
Mabalin nga agkiddaw dagiti daulo ti ahensia a mailaksidda iti election ban babaen ti panangidatagda kadagiti kasapulan a dokumento para iti proyekto a mangrugi sakbay ti Marso 28 ken dagiti naaramid babaen ti kontrata (babaen ti public bidding) wenno iti napagnumuan a kontrata a nabukel wenno naited sakbay ti Marso 28. (Raymund Antonio/Manila Bulletin//Lito Hilidon/Bannawag)
