LOS ANGELES (AP) – Aganay a 10,000 a pagtaengan, building, ken dadduma pay a pasdek iti Los Angeles ti pinuoran ti dua kadagiti kadadakkelan a wildfire a mapaspasamak ita iti LA, kinuna dagiti opisial idi Huebes, ket impaganetgetda kadagiti tattao nga ipangagda ti pammilin nga agbakuitda kalpasan nga adda manen simged a puor ken napartak ti panagdakkelna.
Nangrugi ti napartak ti panagkayamkamna a Kenneth Fire (nagan ti puor) iti naladaw a malem idiay San Fernando Valley dua a milia (3.2 kilometro) laeng ti kaadayona iti maysa nga eskuela a nagkamangan dagiti nagbakuit, ket agturongen iti kabangibang a Ventura County apaman a dimteng ti rabii.
Sumagmamano laeng nga oras sakbayna, impeksa dagiti opisial ti regtada kalpasan a makakita dagiti bombero, babaen ti tulong ti timmalna bassit nga angin ken iti dimteng a tulong manipud iti ruar ti estado, dagiti umuna a pagilasinan ti panagballigida a mangparmek kadagiti uram a nangalan iti biag ti 10 a tao.
“Namnamaenmi a napartak ti panagsaknap daytoy nga uram gapu iti napigsa nga angin,” kinuna ni Los Angeles Mayor Karen Bass.
Trump, nasentensiaan iti pannakakonbiktarna iti <i>hush money case</i>
Inwaragawag met dagiti opisial ti Los Angeles County a ti uram a managan iti Eaton Fire ken nangrugi iti asideg ti Pasadena iti rabii ti Martes, nasuroken a 5,000 nga estruktura ti inuramna—apartment building, negosio, outbuildings, ken luglugan. Iti laud, iti Pacific Palisades, addan 5,300 nga estruktura a dinadael daytoy kadakkelan kadagiti wildfire iti LA.
Amin dagiti dadakkel nga uram a simged ita a lawas iti Los Angeles, masarakan iti agarup 25-milia (40-kilometro) agingga iti amianan ti sentro ti siudad, banag a nangisaknap iti buteng ken ladingit iti pakabuklan daytoy maikadua a kadakkelan a siudad ti pagilian.
Pinulpullo a ligason ti rinebbek ken pinadapo ti uram iti dati a makaay-ayo ti buyana a Pacific Palisades. Dagiti laeng balabala ken dagiti simborio dagiti pagtaengan ti nabati. Idiay Malibu, dagiti laeng immuring a rurog dagiti palma ken niog ti nabati a sitatakder iti rabaw dagiti rebba iti iti igid ti taaw a nakaisaadan idi dagiti pagtaengan.
Di kumurang a lima a simbaan, maysa a sinagoga, pito nga eskuela, dua a libraria, boutique, bar, restauran, banko, ken groseria ti napukaw. Kasta met ti Will Rogers’ Western Ranch House ken ti Topanga Ranch Motel, dagiti dua a landmark sipud pay idi dekada 1920. Saan pay a nangiruar ti gobierno iti pattapatta no kasano ti kaadu ti nadadael wenno no mano nga estruktura ti nauram.
Ti AccuWeather, maysa a pribado a kompania a mangipapaay iti datos maipapan iti paniempo ken ti epektona, inngatona idi Huebes ti pattapattana a nadadael ken pukaw ti ekonomia ket aganay itan iti $135 bilion agingga iti $150 bilion.
Dakkelen ti naaramidan dagiti bombero idi Huebes iti pannakaatipa ti panagsaknap dagiti dadakkel nga uram, ngem nagtalinaed nga adayo pay ti naan-anay a pannakalappedna.
Iti nasapa a paset ti lawas, iti pigsa ti pugso ti angin ti hurricane, simged ti bakras ti turod ti Abagatan a California. Iti agdama, imposible a maibaga ti kinasaknap ti nadadael malaksid iti “naan-anay a didigra ken pukaw,” kinuna ni Barbara Bruderlin, pangulo ti Malibu Pacific Palisades Chamber of Commerce.
“Adda dagiti lugar nga awanen ti nabati uray kayo koma no di ket rugit laeng,” kinuna ni Bruderlin.
Kadagiti 10 a natay, pinasingkedan ni Los Angeles Fire Chief Kristin Crowley a dua kadagitoy ti manipud iti Palisades Fire. Kinuna dagiti opisial ti county a lima ti natay iti Eaton Fire.
Madamadan nga agsapsapul kadagiti bangkay kadagiti rebba, kinuna ni Los Angeles County Sheriff Robert Luna.
Saan a kumurang a 180,000 a tao ti sakupen ti evacuation order, ken agarup 45 a milia kuadrado (117 a kilometro kuadrado) ti nagsaknapan ti uram—agarup kas kalawa ti San Francisco. Ti Palisades Fire itan ti uram a kaaduan iti dinadael iti pakasaritaan ti Los Angeles.
(Associated Press)
