Maysa a babai a pasahero ti inarestar dagiti autoridad ti anti-narcotics iti Ninoy Aquino International Airport (NAIA) idi rabii ti Huebes, Enero 9, kalpasan ti maipagarup a pananggandatna a mangipuslit a mangiserrek iti pagilian iti nasurok a P24 million ti pategna a cocaine.
Simmangpet ti di nainaganan a pasahero nga agtawen iti 29 iti NAIA Terminal 3 iti agarup alas otso iti rabii babaen ti Ethiopian Airlines nga aggapu iti Sierra Leone, West Africa nga addaan iti connecting flight nga agturong idiay Addis Ababa, Ethiopia nga agturong iti Manila.
Segun iti Philippine Drug Enforcement Agency (PDEA), nadlaw ti maysa nga x-ray inspector ti Bureau of Customs (BOC) a naglaon iti mapagduaduaan a banag ti maysa a bagahe a kukua ti suspek iti idadalan daytoy iti x-ray scanning machine.
Indalan dagiti personnel ti PDEA Regional Office National Capital Region (RO NCR) ti bagahe iti K-9 inspection ket nakatakuatda iti kasla pulbos a banag nga agdagsen iti 4,574 a gramo. Nagpositibo idi agangay a cocaine daytoy.
Mayawiden ti bangkay ti napapatay a Filipina iti Slovenia, segun iti DFA
Agpateg iti P24,242,200 dagiti nakompiskar a droga.
Malaksid iti droga, nakaala pay dagiti operatiba kadagiti cellular phone, travel document, ken identification card iti bagahe.
Maipilaan ti suspek iti kaso a panaglabsing iti Section 4 (importation of dangerous drugs), Article II ti Republic Act (RA) 9165 a maawagan iti “The Comprehensive Dangerous Drugs Act of 2002.’’
Segun iti PDEA, addaan iti dusa a tungpal biag a pannakaibalud ken multa a manipud P500,000 agingga iti P10,000,000 ti panagipuslit iti makadadael a droga.
(Chito Chavez/Manila Bulletin)
