Ipatungpal ti Department of Agriculture (DA) ti maximum suggested retail price (MSRP) ti bagas a PhP58 kada kilo mangrugi inton Enero 20, kas impakaammo ni Sekretario ti DA Francisco Tiu Laurel Jr. ita nga aldaw, Enero 10.
Panggep ti patingga a presio(MSRP) a timbengen ti panagtalinaed ti negosio ken ti pagimbagan dagiti aggatgatang ken mannalon.
Maipakat ti MSRP kalpasan ti no mano a lawas a pannakiuman kadagiti agbaybayo/agkiskiskis (iti irik), negosiante, importer, aglaklako, ken dagiti ahensia ti gobierno, a pakairamanan ti Department of Trade and Industry (DTI), Department of the Interior and Local Government (DILG), Department of Finance (DoF), ken ti Philippine National Police (PNP). Nairanta dagitoy a panagsasarita a mangtaming iti agtultuloy nga ingangato ti presio ti bagas, iti laksid ti pannakakissay ti taripa nga impatungpal ni Presidente Marcos Jr. ken ti panagpababa ti sangalubongan a presio.
Segun iti DA, umuna a maipatungpal ti baro nga MSRP iti Metro Manila ket binulan daytoy a marepaso tapno maipakita ti kasasaad ti merkado, agraman dagiti panagbaliw ti sangalubongan a presio.
Mayawiden ti bangkay ti napapatay a Filipina iti Slovenia, segun iti DFA
Inlawlawag ni Laurel nga awan pay ti maipaulog a dusa kadagiti agtagtagilako iti bagas a mangsalungasing iti PhP58 nga MSRP.
Kinuna ni Laurel a no kumaro latta ti situasion, kapilitan nga irekomendar ti (DTI) ken DA iti Presidente ti pannakaipatay ti kangatuan a presio.
Iti sabali a bangir, binabalaw ti Samahang Industriya ng Agrikultura (SINAG) ti panggep ti DA a PhP58 nga MSRP, ta PhP45 kada kilo laeng ti rumbeng a maipasdek a presio ti imported a bagas.
Dinakamat ti SINAG ti kinuna ti House Committee on Agriculture and Food idi napan a bulan, nga PhP42-45 laeng ti kada kilo ti imported a bagas, maibatay iti landed cost a PhP35-38 kada kilo.
Impaganetget pay ti SINAG a masapul nga adda dusa iti panaglabsing iti MSRP, ket insingasingda nga usaren ti Anti-Agricultural Economic Sabotage Act (RA 12022) a pagibasaran iti pannakaipila iti di mapiansaan a kaso kontra kadagiti aglablabes nga agganansia iti bagas ken kadagiti kangrunaan a taraon. (Jel Santos/Manila Bulletin//Lito Hilidon/Bannawag)
