Inukkon ni Presidente Ferdinand Marcos Jr. ti sumagmamano a kameng ti gabinete iti Malakanyang itay Enero 10, tapno pagsasaritaanda dagiti pagannurotan dagiti programa ken proyekto a maisayangkat iti babaen ti PhP6.235 a trilion a nailian a badiet para iti 2025.
Dimmar-ay iti taripnong da Executive Secretary Lucas Bersamin, Sekretario ti National Economic and Development Authority (NEDA) Arsenio Balisacan, Sekretaria ti Department of Budget (DBM) Amenah Pangandaman, Sekretario ti Department of Social Welfare and Development (DSWD) Rex Gatchalian, ken Sekretario ti Department of Labor and Employment (DOLE) Bienvenido Laguesma.
Bayat a maisursurat daytoy, awan ti naipaay a sabali a detalye mainiag iti taripnong.
Pinirmaan ni Presidente Marcos ti nailian a badiet para iti 2025 idi Disiembre 30 kalpasan a marepasona daytoy. Ngem saanna nga inanamongan ti PhP194 a bilion iti line items, ta kinunana a masapul a maitunos dagitoy kadagiti programa a prioridad ti gobierno a mangtaming kadagiti kasapulan ti umili.
Mayawiden ti bangkay ti napapatay a Filipina iti Slovenia, segun iti DFA
Manipud iti PhP194-bilion a di naanamongan a badiet, PhP26.065 a bilion ti maipaay koma kadagiti proyekto iti Department of Public Works and Highways (DPWH), ken PhP168.240 a bilion ti nailatang iti sidong ti “Unprogrammed Appropriations.”
Impatungpal met ti Presidente ti Conditional Implementation kadagiti dadduma a banag tapno masigurado nga epektibo ti pannakausar ti pondo, ket impaganetgetna a saan laeng koma nga apagbiit a solusion ti ipaay ti gobierno, no di ket agpaut a solusion dagiti nabayagen a parikut. (Argyll Cyrus Geducos/Manila Bulletin//Lito Hilidon//Bannawag)
