SIUDAD TI TUGUEGARAO, Cagayan – Isayangkat ti Philippine Air Force-Tactical Operations Group 2 ti aerial search ken rescue mission kadagiti aplaya ti Amianan a Luzon kalpasan ti panagpukaw ti maysa a bilog nga adda kargana a pito a tao bayat ti panagturong daytoy iti Barangay Dilam iti Calayan Island, iti daytoy a probinsia.
Kinuna ni Col. Glen Piquero of PAF-TOG 2 a bayat a maisursurat daytoy, ita a malem ti Enero 17, nga ur-urayenda laeng ti flight directive tapno marugianda ti search and rescue.
Kinuna ni Piquero a mabalin nga iti Siudad ti Laoag ti pagrubuatanda nga agsapul gapu iti di nasayaat a panawen iti probinsia ti Isabela.
Panggepda ti agsapul kadagiti igid ti baybay ti Dalupiri Island ken Fuga Island, agraman kadagiti igid ti baybay ti Pagudpud, Bangui, Pasuquin, ken Bacarra.
Kapitan ti barangay iti Isabela, pinaltoganna ti maysa a mannalon
Kinuna ni Mayor Joseph Llopis ti Calayan a mabalin a nalabsan ti bilog ti isla ti Calayan gapu ta nasipnget pay laeng idi pumanawda iti Claveria.
Nagluas ti bilog, ti MB Ren-Zen 2 manipud iti Claveria, Cagayan nga agturong iti Calayan iti alas 4:30 iti agsapa, idi Mierkoles, Enero 15. Adda karga ti bilog a 5 a tripulante ken 2 a pasahero. (LIEZLE BASA IÑIGO/ Manila Bulletin)
