Impaayan ti Department of Social Welfare and Development (DSWD) iti ayuda a PhP20,000 ti 22-anios a ni Jeny, ti aglaklako iti sabong ti sampagita a napagbiddutan a menor de edad ta nakasuot daytoy iti umasping iti uniporme ti grade school iti maysa a nag-viral iti social media a video a nakairamanan ti maysa a security guard ti maysa a mall.
Babaen ti instruksion ni Sekretario ti DSWD Rex Gatchalian, sinarungkaran ni DSWD spokesperson Assistant Secretary Irene Dumlao ti pamilia ni Jeny idi Biernes, Enero 17, tapno itedda ti damo a tulongda a pinansial, iti ina ni Jeny a ni Judith.
Impakaammo ni Dumlao ken ni Judith nga agsublinto ti maysa a case manager ti DSWD tapno mangisayangkat iti naan-anay a panangtingiting tapno maikeddeng no mabalin a maikkan ni Jeny iti nayon a suporta, a pakairamanan ti livelihood programs.
Iti immuna a pananginterbiu ti social worker ti DSWD ken ni Judith, kinunana a dati a benepisiario ti household-da iti Pantawid Pamilyang Pilipino Program (4Ps) ngem nagturposdan iti nasao a programa ta agtawen itan iti 19 ti kaubingan nga anakda.
Makaammon ni Apo Dios,” kinuna Sen. Imee Marcos iti komento ni BP Duterte iti pannakaisubli ni tatangna iti Filipinas
Impalgak met ni Judith a maysa nga estudiante ni Jeny, first year-nan iti kursona a Bachelor of Science in Medical Technology.
Inlawlawag met ni Judith ngga agpannuray ti pamilia iti matgedan iti panaglako iti sampagita kalpasan ti klase ni Jeny tapno adda gastosenna iti pletena a mapan agbasa ken kadagiti kasapulanna iti eskuela.
Kinuna ni Judith nga isu ti agar-aramid kadagiti kuentas a sabong, idinto a dagiti annakna ken ni lakayna a ni Joel ti mangilaklako.
Napasamak ti nag-viral (nagwaras iti social media) a video idi Disiembre 2024, sakbay ti Paskua, idi inasitgan ti security guard iti sango ti maysa a mall ni Jeny, a kasla kidkiddawen daytoy kenkuana a saan nga aglako iti asideg ti pagserkan ti mall ta mabalin a makasinga kadagiti tattao a sumrek ken rummuar.
Nagbalin a kontrobersial ti nasao a video a naiwarwaras ken pinagbalin a content dagiti vlogger nangruna ti paset a rinabsut ti guardia ti lako ni Jeny a sampagita ken ti mapapati a panangkugtar ti guardia kenkuana. Nagresulta daytoy nga insidente iti panang-bash ken panangkondenar ti kaaduan a nakabuya. Inkeddeng met a dagus ti management ti mall nga ikkaten iti serbisio ti guardia.
Adu a netizens ti immuna a nangipagarup nga ub-ubing nga amang ni Jeny gapu iti kawesna nga umasping iti uniporme ti grade school wenno high school, nga ad-adda a nangrubrob iti kontrobersia.
Nupay kasta, napasingkedan idi agangay nga agtawen ni Jeny iti 22 ken maysa nga estudiante iti kolehio.
Inkeddeng met ti pamilia ni Jeny a saandan nga ipursige ti ania man a legal nga aksion kontra iti security guard. (Ellalyn De Vera-Ruiz/MB)
