SIUDAD TI SAN FERNANDO, PAMPANGA— Pinalagipan ti polisia dagiti negosiante nga agsiput ken agannadda kadagiti transaksionda online kalpasan a naarestarda ti uppat a mapapati nga scammer babaen ti entrapment operation nga insayangkatda idi agsapa ti Domingo, Enero 19, sadiay Barangay Burnay, Talavera, Nueva Ecija.
“Agserbi koma daytoy a pammalagip kadagiti umili nga agannadda kadagiti transaksionda online. Agtultuloy ti inobasion dagiti kriminal, ngem dakami iti PNP, nagtalinaedkami a naridam iti ayatmi a mangarestar kadakuada ket maipasiguradomi ti kinatalged ti komunidad,” kinuna ni Police Brig. Gen. Jean S. Fajardo, hepe ti Police Regional Office-3 ken agdama a pannakangiwat ti Philippine National Police.
Segun iti imbestigasion, maysa a lalaki nga agtawen iti 24 ti immasideg ken ni Mr. Cordova, 32, maysa a negosiante iti Cabanatuan City. Nagpammarang daytoy a buyer ken reseller dagiti piesa ti motor, a gimmatang kenkuana kadagiti piesa nga agdagup ti bayadbna iti P809,000. Indatag ti lalaki ti maysa a palsipikado nga online transaction slip kas pammaneknek ti panagbayadna iti order.
Impatulod ni Cordova dagiti piesa babaen ti maysa a nalatak a delivery service. Napan iti banko kalpasanna tapno kitaenna ti bayad dagitoy ngem naduktalanna nga awan ti naideposito a bayad.
Nagpatulong daytoy kadagiti polis ket nangisayangkatda iti entrapment operation. Uppat a suspek—maysa a lalaki nga agtawen iti 25, maysa a babai nga agtawen ti 22 manipud iti Barangay Burnay, ken dua pay a lallaki, a ti maysa ket agtawen ti 28, manipud iti Barangay San Pascual, Talavera—ti naarestar.
Articles of Impeachment kontra ken ni VP Duterte, dimmanonen iti plenario ti Kamara
Naala dagiti polis iti ikut dagiti suspek dagiti piesa ngem nakalibas ti kangrunaan a suspek ket sapsapulen ita dagiti autoridad.
(Liezle Basa Iñigo/Manila Bulletin)
