Makapabang-ar iti rikna ti pakaammo ni Marco Rubio, kaddutok a United States Secretary of State, maipanggep iti panangriribuk ti China iti West Philippine Sea (WPS), kas kinuna ni Diputado Robert Ace Barbers (Surigao del Norte 2nd district) idi kalman, Enero 19.
Kinuna ni Barbers (Surigao del Norte 2nd district) Barbers a ti pagtaktakderan ni incoming US Secretary of State Senator Rubio mainaig iti kinaranggas ti China iti WPS ket maysa a ballaag kontra iti agtultuloy a di panangraem ti China iti teritorio ti Filipinas ken Taiwan.
Binabalaw ni Rubio dagiti tignay ti China a makadadael unay iti kinatalged iti WPS, a kunana a mabalin a mangtignay iti US a "mangsaranget" no adda "di nainkalintegan" nga aramiden ti Beijing maibusor iti Filipinas wenno Taiwan.
Iti panagtestimonia ni Rubio iti sango ti Senate Foreign Relations Committee iti pannakadutokna a kas US Secretary of State idi Enero 15, kinunana a di koma agisaysayangkat ti China iti ania man a nasikap wenno di nainkalintegan a banag iti Filipinas ken Taiwan, no kayat ti China a natibker ti relasionna iti US.
Impakdaar pay ni Rubio a mapilitan ti US a mangdepensa iti Filipinas no bilang adda di malapdan a rinnirisis ti China ken Filipinas.
Impaganetget ni Rubio ti kinapateg ti Filipinas iti US, saan laeng nga iti benneg ti militar, no di ket pay iti benneg ti ekonomia. (Ellson Quismorio/Manila Bulletin//Lito Hilidon/Bannawag)