February 14, 2025

Home DAMDAMAG Nasional

Departamento ti Agrikultura, namnamaenna a lumaka ti presio dagiti taraon inton dumakkel ti suplay, produksion

Departamento ti Agrikultura, namnamaenna a lumaka ti presio dagiti taraon inton dumakkel ti suplay, produksion

Agtalek ti Department of Agriculture (DA) a lumaka ti presio dagiti taraon iti sumaganad a bulan, kalpasan ti manamnama a panagsubli ti produksion ken suplay ti taraon iti normal a kasasaad.

Iti maysa a news forum itay Enero 18, kinuna ni Assistant secretary ti DA Arnel de Mesa a pattapattaen ti ahensia a lumaka ti presio ti karne ti baboy, ikan, natnateng, ken bagas.

Segun ken ni De Mesa, ti panagngina ti karne ti baboy ket epekto ti agtultuloy nga African Swine Fever (ASF) ken ti dakkel a pakasapulan iti daytoy iti maudi a paset ti 2024, ngem manamnama a lumaka ti presio daytoy inton Pebrero, ta maisublin ti suplay dagiti agtartaraken ti baboy.

Innayon ni De Mesa a ti panaglukat ti panawen ti panagkalap iti pagilian ti mangitunda iti panagbaba ti presio ti ikan.

Nasional

Pastor Quiboloy, naisublin iti Pasig City Jail

Lumaka met ti presio dagiti natnateng iti sumaruno a bulan ta nakalung-aw metten dagiti taltalon nga inapektaran ti El Niño iti umuna a paset ti 2024, ken dagiti nagsasaruno a bagyo a nangbegbeg iti pagilian iti maudi a paset ti 2024.

Manamnama a lumaka ti presio ti bagas gapu iti panagbaba iti presio daytoy iti sangalubongan a merkado ken ti pannakaideklarar iti “food security emergency” iti pagilian.

Naikeddeng nga ideklarar ti DA ti “food security emergency” tapno lumaka ti presio ti bagas iti pagilian babaen ti panangipalubos iti National Food Authority (NFA) a mangiruar iti lebbenda a bagas. (Dexter Barro II/Manila Bulletin//Lito Hilidon/Bannawag)