Insingasing ni Senador Raffy Tulfo itay Enero 21 a maipaulog koma manen ti deployment ban iti Kuwait gapu iti pannakatay ti dua nga Overseas Filipino Workers (OFWs) iti nasao a pagilian.
Iti maysa a bista ti Senate Committee on Migrant Workers, dinagadag ni Tulfo ti Department of Migrant Workers (DMW) ken ti Department of Foreign Affairs (DFA) nga isingasingda ti deployment ban ken ni Presidente Marcos Jr. gapu iti kaudian a pannakatay ti dua a Filipino iti Kuwait.
Impaganetget ni Tulfo a nupay apresiarenna ti napartak a pannakaipaay ti hustisia iti pannakatay dagiti OFW, saan nga umdas daytoy. Kayat ni Tulfo nga awan koman ti mapapatay nga OFW iti Kuwait.
Mailaksid iti singasing a deployment ban dagiti OFW nga addan kontratada ken dagiti agsubli iti Kuwait.
Inanamongan ni DFA Undersecretary Eduardo De Vega ti singasing ni Tulfo ta mabalinda nga usaren daytoy tapno maitandudo ti naan-anay a pannakasalaknib dagiti OFW. Dinakamat ni De Vega ti panangiparit idi ti Indonesia iti pannakaipatulod dagiti household workers iti Middle East.
Ngem impakdaar ni De Vega ti mabalin nga epekto daytoy iti diplomatiko a relasion ti Filipinas ken Kuwait kas idi impaulogda ti deployment ban idi 2023 gapu iti napasamak ken ni Jullebee Ranara, a nasarakan ti nauram a bangkayna iti desierto.
Nupay adda nabukel a tulag idi 2018, inaklon ni De Vega nga agkedked ti Kuwait a makisarita wenno mangnayon iti probision tapno maan-anay ti pannakasalaknib dagiti mangmangged.
Kinuna ni Sekretario ti DMW Hans Leo Cacdac a silulukat ti ahensia iti singasing ni Tulfo ngem kiniddawna a maikkan iti umdas a panawen tapno adalenna ti singasing.
Iti agdama, adda 268,000 nga OFW iti Kuwait, ket kaaduan kadagitoy ti agtrabaho a kas domestic helper.
Impaganetget ni Tulfo a kasapulan ti deployment ban tapno masalakniban dagiti OFW iti nakarkaro a pannakadangran.
Innayonna nga uray maibalud a dagus ti nagbasol, no kanayon met a mapasamak nga adda mapapatay nga OFW, awan met la ti mamaayna ti panggepda a mangsalaknib kadagiti OFW. (Wilnard Bacelonia/PNA//Lito Hilidon/Bannawag)