SIUDAD TI SAN FERNANDO, La Union – Nagun-oden daytoy a probinsia ti full sanitary landfill coverage wenno kompleto a pagibellengan iti basura kalpasan ti pananglukat ti dua a maudi nga ili iti bukodda a dumpsite itay nabiit.
Pormal a linuktan ti gobierno probinsial nga indauluan ni Gov. Raphaelle Veronica “Rafy” Ortega-David dagiti sanitary landfill ti Burgos ken Bagulin bahyat ti maudi a quarter ti 2024.
Iti pannakalukat dagitoy a pagibellengan iti basura, addan bukod a dumpsite amin a 19 nga ili daytoy a probinsia.
Dinakamat ni Ortega ti napateg nga akem dagitoy a pasilidad iti pannakasalaknib ti aglawlaw ken iti panggep ti probinsia nga agbalin a Heart of Agri-Tourism iti Aminan a Luzon.
ITI BENGUET: Flood protection project iti Ballili River iti La Trinidad, nalpasen
Kiniddawna kadagiti LGUs ti panangipanamnamada iti umno a pannakaimaton dagitoy a pasilidad tapno agpaut ti pannakaaramat dagitoy.
Iti agdama, ti laeng La Union ti kakaisuna a probinsia iti Ilocos Region nga addaan iti 100 percent sanitary landfill facility coverage per component local government unit, kas mayalubog iti Republic Act 9003 wenno iti Ecological Solid Waste Management Act of 2000. (Liezle Basa Iñigo/ Manila Bulletin)
