Kayat ni Presidente Ferdinand Marcos Jr. nga ad-adu pay a dadakkel a dam ti maipatakder iti pagilian, saan laeng a mangtarimaan kadagiti addan, kas kinuna ti daulo ti National Irrigation Administration (NIA) a ni Eduardo Guillen itay Enero 21.
Segun ken ni Guillen, tallo a dam iti Luzon ti nakaalan iti pondo ken sisasaganan a maipatungpal ti pannakapabaro dagitoy: ti Balog-Balog Dam iti Tarlac, ti Ilocos Norte-Ilocos Sur-Abra Irrigation Project, ken ti Tumauini Dam iti Isabela.
Kinuna Guillen a kayat ni Presidente Marcos a nayonan pay dagiti dam iti pagilian, gapu ta 50 a tawenen ti Pantabangan ken Magat dam.
Iti kallabes, inkari ni Presidente Marcos a maikkan iti umdas a pondo ti NIA, ta kayatna ti mangipatakder iti daddadakkel a dam iti pagilian.
Iti sidong ti programa ken proyekto ti NIA para iti 2025, PhP20.84 a bilion ti nailatang para iti Pump Irrigation Sub-Program, PhP7.88 a bilion ti para iti Ilocos Norte-Ilocos Sub-Abra Irrigation Project, ken PhP2.49 a bilion ti pondo ti Balog-Balog Multipurpose Project Phase II iti Tarlac.
Nailatang ti PhP99.5 a milion para iti Special Irrigation Sub-Program. (Betheena Unite/Manila Bulletin//Lito Hilidon/Bannawag)