Impasigurado ni Embahador ti Filipinas iti Washington Jose Manuel “Babe” Romualdez ita nga aldaw, nga agtalinaed ti natibker a panagasmang ti Filipinas ken Estados Unidos (US) iti sidong ni Presidente Donald Trump.
Segun ken ni Romualdez, agpada a suportaran ti Democrat ken Republican ti Filipinas no maipapan iti parikut iti South China Sea (SCS).
Iti umuna a termino ni Trump, pinapigsana ti presensia ti militar ti US iti SCS tapno sarangtenna ti China, ngem dina pay tinaming ti parikut ita, ta bumilbileg ti China kadagiti napalabas a tawen.
Ngem segun ken ni Romualdez, a dimmar-ay iti panagsapata ni Trump idi Enero 20, indatag dagiti Republican ken Democrat a Senador ti sayangkat para iti tulong militar iti Filipinas nga agtultuloy iti las-ud ti uppat a tawen.
Patien ni Romualdez nga awan ti dakkel a panagbalbaliw iti foreign policy ti Estados Unidos iti maikadua a termino ni Trump. (Raymund Antonio/Manila Bulletin//Lito Hilidon/Bannawag)