Sinupiat ni Senate President Francis “Chiz” Escudero itay Enero 22 dagiti alegasion nga adda blangko iti PhP6.3-trilion a General Appropriations Act (GAA) of 2025.
Iti maysa a press briefing iti Senado, kinuna ni Escudero a di nakappapati dagiti iwarwaras ni dati a presidente Rodrigo Duterte ken dadduma a kakaduana idinto a dagiti dokumento a dakdakamatenda ket ti di nairehistro a kopia ti 2025 national budget bill.
Kinuna ni Escudero nga adda nailanad iti tunggal linia, ken awan ti blangko, iti kopia ti nairehistro a national budget bill a naipatulod iti Malakanyang tapno pirmaan ti Presidente.
Segun ken ni Escudero, adda 200,000 a linia ti badiet a nakaisuratan ti paulo, nagan ti proyekto, ken gatad, ket saan a nalaka nga ibati a blangko dagitoy.
Kinuna ni Escudero dina ammo no nakalaan ni Isidro Ungab, dati a daulo ti House appropriations committee, iti kopia ti report ti bicameral conference committee nga ibagbagada nga adu ti blangkona.
Patien ni Escudero a politika ti motibo ti panangkuestionar iti 2025 GAA, ket kinunana a saanen a naklaat iti adu a panangdillaw wenno panangperdi a tumpuar ta asidegen ti panagbobotos. (Hannah L. Torregoza/Manila Bulletin//Lito Hilidon/Bannawag)