Rambakan ti Ilocos Sur ti panagwaywayas daytoy a kas probinsia babaen ti parambak a maawagan iti Ilocos Sur Festival a mairugi babaen ti maysa a misa inton malem ti Enero 28, 2025 a sarunuen ti prosesion wenno pannakailibut dagiti rebulto dagiti santo a patron dagiti ili ken dagiti nadumaduma a Marian images.
Mailukat met ti Trade and Food Fair iti agsapa ti Enero 29 ken maangay ti Rabii Dagiti Balikbayan iti karabiyanna.
Maysanto pay a tampok ti Gen Z- Zarzuela a pagsasalisalan dagiti grupo dagiti ubbing ken agtutubo ti mangiparang iti mini zarzuela. Maiduma iti tradisional a drama iti entablado nga umabot iti dua oras, mapan a 30 a minuto laeng ti naited nga oras a panagpabuya ti tunggal grupo gapu ta napagbalin a napaspas ti taray ti istoria. Maysa daytoy nga inobasion tapno maallukoy dagiti ubbing a mangituloy iti daytoy dandanin aglumen a pabuya a naglatak iti Ilocos Sur idi dekada ‘70 agingga iti ‘90.
Karaman pay kadagiti tampok iti 18 nga aldaw a selebrasion ti pannakaangay ti Miss Ilocos Sur ken Mister Ilocos Sur, street dancing ken marching band competition, boxing event, motor racing and show, e-sports, tattoo expo, salisal ti banda, salisal iti panagluto nga inawaganda iti “Ilocuisine”, ken ti “Pinaka” a pangiparangan dagiti mannalon iti naidumduma ti kadakkel wenno sagudayna a natnateng, prutas, ken dingo.
Maipadpadamag a 'kumaw' iti Nueva Vizcaya, 'fake news,' segun iti PNP
Maigibus ti parambak babaen ti Father Jose Burgos Awards a pakapadayawan dagiti Ilocos Surian a nagballigi iti nadumaduma a tay-ak ditoy pagilian ken ballasiw-taaw, kasta metten kadagiti nakaited iti dayaw para iti Ilocos Sur.
Mairaman a mapadayawan (posthumous) daydi Department of Agriculture Uundersecretary Deogracias Victor “DV” Savellano. Ni Gobernador Jeremias “Jerry” Singson a mismo ti nanginominar kenkuana.
Maipalagip a ni Savellano nga agdama idi a gobernador ti Ilocos Sur ti nangirugi iti pannakarambak ti panagwaywayas ti Ilocos Sur idi 2008. Naawagan ti immuna a parambak kas Kannawidan Ylocos Festival sakbay a napagbalin a kas Ilocos Sur Festival itay napan a tawen. Kadaydi met la a tawen a naangay ti umuna nga edision ti Father Jose Burgos Awards. (MST)
