Dua a titulo ti inyalat ni Jarina Kumari Sandhu a nangibagi iti Cauayan City, iti naangay a Queen Isabela 2025 iti Capital Arena, Siudad ti Ilagan, itay Enero 22.

Mapan a 33 a kandidata ti nagsasalip iti Queen Isabela 2025 a paset ti panangrambak iti Bambanti Festival ti probinsia.

Ni Jarina ti nakoronaan a kas Queen Isabela 2025 ken Miss Universe Philippines-Isabela 2025.

Dagiti nangyalat iti Queen Isabela 2025 a da (agpakanawan): Criselle Anne Gregorion manipud iti Ramon (2nd Runner-up), Johnlene E. Ariola ti Ilagan City (Queen Isabela Culture and the Arts 2025), Jarina Sandhu ti Cauayan City (Queen Isabela 2025 ken Miss Universe Philippines Isabela 2025), Mhira Angelene Py Valenciang ti Cordon (Queen Isabela Tourism 2025), ken ni Jhudiel Bunissen Taglinod manipud ti Echague (1st Runner-up), a naangay iti Capital Arena, Ilagan City itay Enero 22. (Ladawan: Pammadayaw ti Isabela PIO)

Iti benneg ti Q&A, naisaludsod ken ni Jarina no ad-adda kadi a ma-pressure dagiti agtutubo iti daytoy a henerasion ngem kadagiti napalabas a henerasion.

Lokal

32 ti nadunor iti aksidente iti dyip iti Kalinga

Insungbat ni Jarina, "Diak patien a ma-pressure daytoy a henerasion. Maysaak nga Isabelina, ket adda turedko a mangsaranget kadagiti pagbubutngak. Iti kinatured, kaipapananna a dimo ipalubos a ti buteng ti mangituray kenka. Parmekem ketdi tapno maital-oka."

Nakoronaan a kas Queen Isabela Tourism 2025 ni Mhira Angelene Py Valenciang ti Cordon, idinto a Queen Isabela Culture and the Arts 2025 ni Johnlene E. Ariola ti Siudad ti Ilagan.

Ni Jhudiel Bunissen Taglinod manipud iti Echague ti nangyalat iti 1st Runner-up, ket nagun-od ni Criselle Anne Gregorio manipud iti Ramon ti 2nd Runner-up.

Ni Jarina ti mangibagi iti Isabela iti maangay a Miss Universe Philippines (MUPH) 2025.

(Isabela PIO//Bannawag NewsTeam)