Saan a nakalapped dagiti naglabas a saplit ti panawen a nakaapektar iti agrikultura ti Villasis, Pangasinan iti maudi a kuarter ti 2024 tapno rambakan manen ita a tawen dagiti umili ti "Talong Festival" kas panagyaman iti nalabon nga apit kangrunaan ti tarong a maibilang a kaaduan a maimulmula itoy nga ili.
Naitampok iti Talong Festival idi Enero 16 ti "Pinakbet sa Kawa" a nakipartisiparan ti amin a 21 a barangay ti ili. Naggigiddan a nagluto dagiti pannakabagi ti tunggal barangay iti bukodda a bersion ti pinakbet a kangrunaan a ramen ket ti tarong a produkto ti Villasis.
Inluto ti tunggal partisipante ti 30 a kilo a tarong, 10 a kilo a paria, 10 a kilo a kamatis, 4 a kilo ng okra, ken 2 a kilo a sili nga aruy-oy. Ti gobierno munisipal a mismo ti nangted kadagitoy a nateng a mailuto, a ginatangda kadagiti mannalon iti farm gate price.
Segun ken ni Roberto Padilla, high value commercial development program municipal coordinator, nagatang dagiti tarong iti PhP110 kada kilo; paria, PhP110 iti kada kilo; kamatis, PhP65 kada kilo; okra, PhP65 kada kilo; ken sili, PhP80 kada kilo.
Maipadpadamag a 'kumaw' iti Nueva Vizcaya, 'fake news,' segun iti PNP
Inyam-ammo ti Villasis, a maibilang a vegetable bowl ti Pangasinan, ti Talong Festival 19 a tawenen ti napalabas kas panagyaman ken pammaregta kadagiti mannalon, nangruna dagiti agmulmula iti tarong.
Idi 2024, bimmassit iti 20 agingga iti 30 a porsiento ti daga a mapagmulmulaan iti tarong iti Villasis manipud iti 400 nga ektaria a plantasion gapu kadagiti bagyo ken layus iti maudi a kuarter ti tawen.
“Ita nga Enero, bimmassit ti standing crops gapu kadagiti napalabas a bagyo ngem maragsakan latta met dagiti mannalon ta nasayaat ti presio ita ti tarong. Nupay, bimmassit ti land area a namulaan, saan met a naapektaran ti produksion ta agmulmulada iti hybrid,” kinuna ni Padilla.
Kangrunaan a mamulmulaan iti tarong dagiti barangay ti Piaz ken Caramutan. Adda pay dagiti plantasion ti tarong kadagiti barangay ti San Blas, Lipay, Puelay, Barangobong, ken Amamperez.
Kinuna ni Padilla a dakkel a tulong kadagiti mannalon ti farm input subsidy program nga insayangkat ni Mayor Nonato Abrenica nasurok a sangapulo a tawenen ti napalabas.
Mamindua met iti makatawen a mangipapaay ti gobierno munisipal iti subsidy ti abono kadagiti mannalon.
Kabayatan ti Farmers Day ti piesta ita a tawen, inted ti gobierno munisipal iti sumagmamano nga asosasion dagiti mannalon ti tallo a traktora ken tallo a multi-cultivator ken dadduma pay nga alikamen iti talon.
Kinuna ni Abrenica nga agtaltalinaed ti Villasis a kas top producer ti tarong iti Ilocos Region ken kangrunaan a supplier ti tarong kadagiti public market iti Metro Manila. (Liwayway Yparraguirre/Philippine News Agency)
