SIUDAD TI BAGUIO – Binalakadan ti Commission on Elections (COMELEC) itoy a siudad ti Department of Social Welfare and Development (DSWD) a saanda a palubosan dagiti politiko a makipaset kadagiti aktibidad ti panagiwaras iti ayuda tapno maliklikan ti pannakausar dagitoy nga aktibidad a para iti politika.
Kinuna ni COMELEC-Baguio officer Atty. John Paul Martin a saan met a mapalubosan a maidispley dagiti tarpaulin dagiti politiko kadagiti lugar a pagiwarasan iti ayuda ti gobierno.
“Umuna, saan pay a maipalubos ti panagkampania, nupay addan dagiti maar-aramid a mabalin a maibilang a panagkampania. Maikadua, ti gobierno ti mangmangted iti ayuda, saan a dagiti politiko, isu a saanen a kasapulan nga addada sadiay,” kinuna ni Martin.
Kabayatanna, kinuna ti DSWD-Cordillera Administrative Region (DSWD-CAR) nga agtultuloy ti panangipatungpalda kadagiti programa ti panagiwaras iti ayuda kalpasan a nakagun-od ti ahensia iti exemption manipud iti COMELEC.
Maipadpadamag a 'kumaw' iti Nueva Vizcaya, 'fake news,' segun iti PNP
“Ituloy ti DSWD-CAR ti implementasion dagiti promotive ken protective programs ken serbisiona iti CAR kabayatan ti election ban para iti May 2025 mid-term elections. Maaramid daytoy kalpasan a maawatmi ti naaprobaran nga exemption manipud iti Commission on Elections a mangipalubos iti Departamento a mangipaay iti ayuda kadagiti klientena gapu ta awan ti ania man a wagas a maimpluensiaan daytoy ti pannakaisayangkat ti eleksion inton Mayo 12, 2025,” kinuna ni DSWD-CAR Director Maria Aplaten iti maysa a press release.
Dagitoy a programa ket pakairamanan ti Pantawid Pamilyang Pilipino Program (4Ps), Sustainable Livelihood Program (SLP), Supplemental Feeding Program, PAMANA, Pag-Abot Program, Kapit Bisig Laban sa Kahirapan Comprehensive and Integrated Delivery of Social Services (KALAHI-CIDSS), Enhanced Partnership Against Hunger and Poverty (EPHAP), social pension, Assistance to Individuals in Crisis Situation (AICS), ken Ayuda sa Kapos ang Kita Program (AKAP).
Kinuna ni Aplaten nga agtultuloy ti serbisio dagiti residential care facilities ti DSWD a pakairamanan ti Regional Haven for Women and Girls, Reception and Study Center for Children (RSCC) ken ti Regional Rehabilitation Center for the Youth (RRCY) tapno masigurado a saan a malapdan ti panagtultuloy ti rehabilitasion. (Liza Agoot/Philippine News Agency)
