Mamati ni Executive Secretary Lucas Bersamin a saan nga ikeddeng ti Korte Suprema (SC) nga imbalido ti PhP6.235 a trilion a nailian a badiet ta kasapulan nga aggunay ti gobierno.
Imbatad ni Bersamin daytoy iti baet ti mabalin a pannakakarit ti nailian a badiet para iti 2025 gapu kadagiti maipapan a blangko a probision iti 2025 General Appropriations Act (GAA).
Iti press conference a naangay iti Siudad ti Pasay ita nga aldaw, Enero 24, kinuna ni Bersamin, dati a Chief Justice ti Korte Suprema, a saan a lapdan ti SC ti badiet para iti 2025.
Kinuna ni Bersamin a saan a lapdan ti Malakanyang dagiti mangkarit iti konstitusionalidad ti national budget, ngem saan a mapabasol ti Ehekutibo iti dayta a banag.
Segun ken ni Bersamin, saan a ti Malakanyang ti nagkurang no adda man blangko a paset ti bicam report, ta saanda a biang daytoy no di ket trabaho ti Kongreso.
Innayon ni Bersamin a ti laeng nalpas a dokumento a pinirmaan ti Presidente ti biangda.
Iti laksid ti sayangguseng mainaig iti nailian a badiet, kinuna ni Bersamin nga ipatungpal latta ni Presidente Marcos ti 2025 GAA.
Pinirmaan ni Marcos ti 2025 national budget idi Disiembre 30, 2024. Ngem saanna nga inaprobaran dagiti line item nga agdagup iti PhP194 a bilion ta kununa a masapul a maitunos dagitoy iti kangrunaan a programa ti gobierno a mangtaming iti kasapulan dagiti umili. (Argyll Cyrus Geducos/Manila Bulletin//Lito Hilidon/Bannawag)