Pinatalgedan ti Bureau of Jail Management and Penology (BJMP) ita nga aldaw, Enero 24, nga adda pammilin ti korte ti Pasig City a mayakar ni Apollo Quiboloy iti ospital ti gobierno manipud iti pribado nga ospital.
Naipan iti ospital ni Quiboloy idi Enero 18 kas inrekomendar ti doktor ti BJMP ta marigatan nga umanges bayat ti pannakaipupokna iti Pasig City Jail Male Dormitory.
Ngem imbalakad ti doktor iti ospital a nangitarayanda a yakarda ni Quiboloy iti sabali nga ospital ta kurang ti ramitda kalpasan a matakuatanda nga adda community-acquired pneumonia ni Quiboloy.
Kinuna ni Supt. Jayrex Bustinera, pannakangiwat ti BJMP, naawatda ti court order nga impaulog ti hues ti Pasig RTC 159 itay Enero 23, a mangibilbilin a masapul a mayakar ni Quiboloy iti para publiko nga ospital.
Saan ketdi a sinungbatan ni Bustinera no pudno a naipan ni Quiboloy iti Medical City ket ita, mayakar iti Pasig General Hospital. Kunana a saan a mabalin a maiwaragawag iti publiko ti detalye ti panagpaagas ni Quiboloy para iti seguridadna.
Iti pannakayakar ni Quiboloy iti para publiko nga ospital, impanamnama ni Bustinera iti publiko nga agtalinaed ni Quiboloy iti sidong ti BJMP ket nainget a seguridad ti maipatungpal bayat ti kaadda daytoy iti ospital.
Innayon ni Bustinera a matrato ni Quiboloy a kas gagangay a PDL (person deprived of liberty) ken mayannatup iti linteg ken kadagiti pagalagadan iti pagbaludan. (Chito Chavez/Manila Bulletin//Lito Hilidon/Bannawag)