February 14, 2025

Home DAMDAMAG Nasional

AFP, dina pinatgan ti kiddaw ti China

AFP, dina pinatgan ti kiddaw ti China

Nagkedked ti Armed Forces of the Philippines (AFP) iti kiddaw ti China nga ikkaten ti Filipinas iti pagilian ti “Typhon” Mid-Range Capability (MRC) nga aramid ti Estados Unidos (US), ken impettengna a nairanta ti kaadda ti "Typhon" a mangpabileg iti depensa kadagiti pangta iti seguridad ti pagilian.

Kinuna ni Col. Francel Margareth Padilla, pannakangiwat ti AFP, a maitunos iti nabayagen a relasion ti Filipinas ken US iti benneg ti depensa ti kaadda ti mid-range missile system iti FIlipinas.

Segun iti report ti Reuters, inyakar ti US ti Typhon missile system iti sabali a lugar iti isla ti Luzon tapno maammuan no sadino ken kasano ti kapartak a mayakar ti bateria ti missile iti sabali a firing position.

Inusar ti US ti Typhon iti Laoag, Ilocos Norte idi Abril 2024 para iti joint military exercise ti AFP ken US Army.

Nasional

Pastor Quiboloy, naisublin iti Pasig City Jail

Binabalaw ni Mao Ning, pannakangiwat ti Chinese Foreign Ministry, daytoy a tignay, ket kinunana a masapul a maikkat ti Typhon missile system iti Filipinas iti kabiitan a panawen.

Segun ken ni AFP Chief General Romeo Brawner Jr., pagbuligan ti US ken Filipinas a desisionan ti pannakaisubli ti Typhon babaen ti Mutual Defense Board-Security Engagement Board (MDBSEB).

Innayon ni Brawner ti gandat ti AFP a manggatang iti Typhon missile system, addang nga inanamongan ti National Security Council (NSC). (Martin Sadongdong/Manila Bulletin//Lito Hilidon/Bannawag)