February 14, 2025

Home DAMDAMAG Nasional

Amian, mangyeg iti salemsem iti Luzon, segun iti PAGASA

Amian, mangyeg iti salemsem iti Luzon, segun iti PAGASA

Marikna ti Luzon ti nalamiis a panawen inton umay a lawas gapu iti pimmigsa nga amian (northeast monsoon), impakaammo ti Philippine Atmospheric, Geophysical and Astronomical Services Administration (PAGASA) ita nga aldaw, Enero 24.

Kinuna ni Benison Estareja, Weather Specialist ti PAGASA, apektaran ti nalamiis a panawen ti adu a paset ti Luzon, nangruna iti agsapa ti Lunes, Enero 27 ken 28, ta mabalin a dumanon ti temperatura iti kababaanna iti daytoy a bulan.

Pattapattaen ti PAGASA nga iti Enero, marikna ti Metro Manila ti temperatura manipud 19°C agingga iti 33.9°C, idinto a 10.2°C agingga iti 27.8°C ti kalam-ekna kadagiti kabambantayan a paset ti Luzon. Iti dadduma pay a paset ti Luzon, marikna ti 13.1°C agingga iti 35.5°C a temperatura.

Iti Visayas, 20.1°C agingga iti 35°C ti marikna a temperatura, 13.7°C agingga iti 33.4°C ti temperatura kadagiti bambantay a paset ti Mindanao, ket 18.8°C agingga iti 37.1°C met iti dadduma a paset ti Mindanao.

Nasional

Pastor Quiboloy, naisublin iti Pasig City Jail

Iti ipipigsa ti amian iti arinunos ti lawas, manamnama ti kalalainganna a tudo iti Cagayan Valley, Aurora, Quezon, Bicol, ken iti kabangibangda a lugar. (Elallyn De Vera-Ruiz/Manila Bulletin//Lito Hilidon/Bannawag)