
Lukatan ti National Commission for Culture and the Arts (NCCA) ti National Arts Month (NAM) itoy a tawen inton Pebrero 3 iti NCCA Office Building iti Intramuros, Manila.
Mangrugi iti alas 8 ti bigat, maangay ti opening ceremony iti ruar ti pasdek ti NCCA iti General Luna Street sa kalpasanna, maiparang ti baro a façade ti pasdek a naaramid a kas iti singkaban, ti tradisional a bisti nga arko ti Bulacan.
Tumabuno ni Miss Universe 2018 Catriona Gray, Arts and Culture Ambassador ti NCCA, iti seremonia ti pannakalukat ti National Arts Month a dar-ayan pay da NCCA Chairman Victorino Mapa Manalo, Executive Director Eric B. Zerrudo, da Deputy Executive Director Marichu Tellano ken Bernan Joseph Corpuz, NAM Secretariat, ken dagiti pannakabagi manipud iti Subcommission on the Arts, Cultural Agencies, Intramuros Administration, ken dagiti naawis nga estudiante, performers, ken sangaili.
Kalpasan ti opening ceremony, maangay ti parada iti aglawlaw ti Intramuros a kaduaen ti marching band ken street performers. Rikusen ti parada ti Muralla Street ken lumabas kadagiti pagadalan ken unibersidad iti aglawlaw ti lugar, kasta met ti historiko a Katedral ti Manila.
Agngudo ti parada iti paraangan ti Museo de Intramuros ket maidasaran dagiti timmabuno iti merienda ken libreda a sumrek iti museo kas pammadayaw ti Intramuros Administration.
Marambakan itoy a Pebrero ti NAM kas sagudayen ti Presidential Proclamation 683, a pinirmaan ni Presidente Corazon C. Aquino idi 1991. Yawis ti NCCA iti amin tapno mapadayawan ti mamagbalbaliw a bileg ti arte ken ti kinasaririt dagiti Filipino nga artist.
Maisayangkat ti parambak babaen ti NCCA Subcommission on the Arts (SCA) nga idauluan ni Komisionero Arvin Manuel Villalon, ken dagiti pito a nasional a komite daytoy: National Committee on Architecture and Allied Arts (NCAAA) nga idauluan ni Cathe Desiree S. Nadal; National Committee on Cinema (NCC) ni Mahar Sulayman “Butch” L. Ibañez; National Committee on Dance (NCD) ni Dr. Lordinio A. Vergara; National Committee on Dramatic Arts (NCDA) ni Eduardo P. Perez; National Committee on Literary Arts (NCLA) ni Niles Jordan D. Breis; ken ti National Committee on Visual Arts (NCVA) nga idauluan ni Dr. Dennis E. Montera.
Para iti 2025, addaan ti NAM iti tema a napauluan “Ani ng Sining: Diwa at Damdamin” (Apit ti Arte: Nakem ken Rikna) a mangitampok iti espiritu ken karirikna a mangtigtignay iti kinamanagparnuay dagiti Filipino. (NCCA Public Affairs and Information Office)