
Mangrugi inton Pebrero 15, addanton nalaklaka a bagas a mailako iti presio a manipud PhP29 agingga iti PhP45 kada kilo kadagiti paggroseriaan ken convenience stores, segun ken ni Department of Agriculture (DA) Secretary Francisco Tiu Laurel.
Innayonna a daytoy a naplano a pannakairuar ti nalaklaka ti presiona a bagas, manamnama a makatulong a mangimpluensia iti merkado tapno aglakoda iti bagas iti mas nainkalintegan a presio.
Iti pannakisaritana kadagiti agiwarwarnak idi Enero 23, impalgak ni Laurel a positibo ti resulta ti pannakiinnumanna kadagiti kangrunaan a retail firm iti pagilian.
Kinuna ni Laurel a makitaripnong dagiti retail chain kadagiti opisial ti Food Terminal Inc. (FTI), maysa a korporasion a kukua ti estado a natudingan a mangtaming iti suplay ti bagas babaen kadagiti makipartisipar a pagtagilakuan.
Segun iti DA, umun-una a maipadas ti nasao a nalaklaka a pannakailako ti bagas iti Metro Manila, a pakapalpaliiwan a yan ti nangangato a presio ti bagas.
Inlawlawag met ni Laurel a ti kaadda ti nalaklaka a bagas, agpannuray iti desision dagiti retail store.
Segun pay iti DA, ti PhP29 kada kilo a bagas, magun-od laeng para kadagiti vulnerable sector iti pagilian, kasta met ti Rice-for-All (RFA) a programa ti DA.
Nadumaduma a rice grade ti maidiaya iti babaen ti RFA, a pakairamanan ti RFA5 wenno ti 5% ti pannakatumekna a bagas nga aggatad iti PhP45 kada kilo; RFA 25 wenno ti 25%a pannakatumek, PhP38; ken RFA 100 wenno 100% a natumek, PhP36.
Kinuna ni Laurel dagiti retail store nga addaan iti umdas nga espasio a pakaikabilan kadagiti kiosk, aglakoda iti bagas iti sako nga addaan pay iti pagtakal (measuring cup).
Kadagiti met pagtagilakuan a limitado ti espasioda, mailako ti bagas iti sagdua a kilo a sinupot. Ngem gapu ta mai-package daytoy, kinuna ni Laurel a mabalin nga adda nayonna a PhP1 kada kilo.
Kabayatanna, in-inut met a maipababa ti maximum suggested retail price (MSRP) para iti imported rice, nga agdama a sag-PhP58 kada kilo. Mabalin a bumaba daytoy iti agingga iti PhP49 inton Marso no agtalinaed a natalged ti global prices, segun ken ni Laurel.
Inyimplementar ti DA ti MSRP idi Enero 20 tapno masigurado nga agtalinaed a nababa ti presio a mabaelan dagiti consumer kabayatan a masuportaran met ti panagganar ti industria ti bagas.
Mangrugi inton Pebrero 5, kinuna ni Laurel a maipababa iti PhP55 ti MSRP ti imported rice. Inton Pebrero 15, maipababa pay daytoy iti PhP52.
“Inton Marso 1, sapay koma ta magtengtayo ti PhP50 kada kilo, a ti MSRP-na ket PhP49," kinuna pay ti sekretario ti DA. (Dexter Barro II/MANILA BULLETIN)